بی جے پی لیڈرس گوندا نائک اور کرشنا نائک کو بالاخر ملی ضمانت ؛ استقبال کے لئے کاروار جیل پہنچنے والے 6افرادکو پولس نے کیا گرفتار
بھٹکل:13/ اکتوبر (ایس اؤنیوز) بھٹکل کے بی جے پی لیڈرس گوندا نائک اور کرشنا نائک بالاخر آج ضمانت پر رہاہوگئے، مگر ان کے استقبال کے لئے کاروار جیل پہنچنے والے چھ لوگوں کو پولس نے اُدھر ہی دھرلیا ، جن کے تعلق سے بتایا گیا ہے کہ اُن کے نام پولس کی مطلوب شدہ لسٹ میں درج تھے اور وہ گرفتاری کے خوف سے بھٹکل سے فرار ہوگئے تھے۔
پولس ذرائع کے مطابق جن چھ لوگوں کو گرفتار کیا گیا ہے، اُن میں سے چار لوگوں پر ڈکیتی اور پولس اہلکار پر حملہ کرنے کا الزام ہے، جبکہ بقیہ دو لوگوں پر میونسپالٹی عمارت پر پتھرائو کرنے کے تحت کیس درج ہیں۔
گرفتار شدگان کی شناخت راگھو نائک، شری نواس نائک، کمار نائک، شیوراج نائک، راجیش جوجے فرنانڈیز اور اودئے نائک کی حیثیت سے کی گئی ہے۔ ان میں سے پہلے والے چار لوگوں پر دفعہ 395 کے تحت اور آخری دو لوگوں پر پتھرائو کرنے کے معاملات درج کئے گئے ہیں۔
خیال رہے کہ 14/ستمبر کو بھٹکل میونسپالٹی عمارت میں ایک شخص نے دکانوں کو خالی کرانے کے معاملے پر اپنے آپ کو آگ لگادی تھی، جس کے بعد عوام نے سخت ناراضگی ظاہر کرتے ہوئے میونسپالٹی عمارت کے باہر مین روڈ پر دھرنا دیتے ہوئے میونسپالٹی عمارت پر زبردست پتھرائو کیا تھا، اس دوران میڈیا سمیت پولس اہلکاروں کو بھی احتجاجیوں نے فوٹو گرافی و وڈیو گرافی سے روک دیا تھا اور ایسے میں جب ایک پولس اہلکار نے وڈیو گرافی کرنے کی کوشش کی ، تو اُس پر مبینہ طور پر کچھ احتجاجیوں نے حملہ کرتے ہوئے اُس کا کیمرہ چھین لیا تھا۔ اس واردات کے بعد بتایا گیا تھا کہ سو سے زائد لوگوں پر معاملات درج کئے گئے ہیں، جن میں سے کچھ لوگوں کی گرفتاری عمل میں آئی تھی جبکہ بقیہ کافی لوگ بھٹکل سے فرار ہوگئے تھے ، تب سے لے کر اب تک کئی لوگ پولس سے چھپتے پھر رہے ہیں، بتایا گیا ہے کہ اُن فرار شدہ لوگوں میں سے چھ لوگوں کو آج کاروار جیل کے باہر ہی گرفتار کرلیا گیا ہے۔