مغربی بنگال میں نافذ نہیں ہوگی نیشنل ہیلتھ اسکیم ، ہماری ریاست میں پہلے سے ہی اسکیم نافذالعمل ہے : ممتا بنرجی
کولکاتہ،14فروری ( ایس او نیوز؍آئی این ایس انڈیا )مرکزی بجٹ میں اعلان کئے گئے نیشنل ہیلتھ پروٹیکشن اسکیم کو مغربی بنگال حکومت ریاست میں نافذ نہیں ہونے دے گی،ایسا کرنے والی مغربی بنگال پہلی ریاست بن گئی ہے ۔وزیر اعلیٰ ممتا بنرجی نے کہا کہ کافی محنت سے حاصل کئے اپنے وسائل کو ریاست برباد نہیں ہونے دے گی ، اس اسکیم کے لئے 40 فیصد رقم ریاستوں کو دینی ہے۔کرشنا نگر میں ایک اجتماع سے خطاب کرتے ہوئے ممتابنرجی نے کہاہے کہ جب ریاست کے پاس پہلے سے یہ اسکیم ہے تو دوسری اسکیم میں ریاست رقم کیوں ضائع کرے ۔ممتا بنرجی نے مرکزپر مختلف منصوبوں کے لیے پیسہ روکنے کا الزام لگاتے ہوئے دھمکی دی کہ اگر نریندر مودی زیر قیادت حکومت نے اپنی ’’ عوام مخالف‘‘پالیسیاں نہیں بدلیں تو وہ اس کے خلاف ملک بھر میں تحریک شروع کریں گی۔ انہوں نے کہا کہ بی جے پی قیادت والی مرکزی حکومت نے تحفظ اطفال و خواتین سمیت کسانوں، غریبوں اور متوسط طبقہ کے لوگوں سے وابستہ دیگر ترقیاتی پروگراموں کے لئے 90 فیصدی فنڈ روک دیا ہے۔ ترنمول کانگریس کی سربراہ نے کہاکہ لیکن ہم نے ایک بھی منصوبے کو نہیں روکا ہے اور مالیاتی رکاوٹوں کے باوجود اپنے وسائل سے کافی فنڈ دے کر انہیں برقرار رکھا ہے۔انہوں نے کہا کہ اگر مرکزی حکومت نے اس کے ’’ عوام مخالف‘‘ پالیسیاں نہیں بدلی تو وہ اس کے خلاف ملک بھر میں تحریک شروع کریں گی۔
