پنجی ،07؍ فروری (ایس او نیوز؍آئی این ایس انڈیا)عام آدمی پارٹی نے گوا میں بی جے پی کی قیادت والی حکومت پر الزام لگایا ہے کہ وہ الیکشن حکام پر دہلی کے وزیر اعلی اروند کیجریوال کے خلاف ان کے رشوت والے بیان کے سلسلے میں کیس درج کرنے کے لیے دباؤ ڈال رہی ہے۔گزشتہ سال ہوئے گوا اسمبلی انتخابات کے دوران ان کے رشوت والے تبصرے کے لئے درج کی گئی شکایت پر ماپسا میں فرسٹ کلاس جوڈیشل مجسٹریٹ (جے ایم ایف سی)نے کیجریوال کو نوٹس جاری کیا ہے۔اس معاملے میں اگلی سماعت آٹھ فروری کو ہوگی۔ کیجریوال کے خلاف یہاں سے تقریباًنو کلومیٹر دور ماپسا قصبے میں مقامی الیکشن کمیشن حکام کی طرف سے شکایت درج کرائی گئی تھی۔گوا کے عآپ کنوینرایلوس گومز نے بتایا کہ الیکشن حکام نے بی جے پی کی قیادت والی حکومت کے دباؤ میں کیجریوال کے خلاف ایف آئی آر درج کی تھی۔انہوں نے کہا کہ بھارتی الیکشن کمیشن (ای سی آئی)نے اس تناظر میں اپنے مقامی حکام کو ہدایت دی تھی۔گومز نے کہاکہ ہم نے اس ہدایات کے خلاف دہلی ہائی کورٹ کے سامنے عرضی دائر کی ہے، جس پر ابھی سماعت ہو رہی ہے۔اس معاملے میں اگلی سماعت 26 فروری کو ہونی ہے۔