نئی دہلی، 16 جولائی(ایس او نیوز/آئی این ایس انڈیا)عالمی ماحولیات کا حوالہ دے کر اکثر یہی کہا جاتا ہے کہ مستقبل میں پینے کے پانی کے لئے انسانوں کے درمیان جنگ ہو گی  لیکن یہ مستقبل آج ہی کے وقت میں سچ ہوتا دکھائی دے رہا ہے۔آندھرا پردیش میں پیر کو ایک ایسا ہی معاملہ سامنے آیا جہاں پینے کے پانی کے لئے دو خواتین میں لڑائی ہوئی،معاملہ اتنا بڑھ گیا کہ ایک خاتون کی جان ہی چلی گئی۔اس معاملے میں پولیس نے کیس درج کر لیا ہے اور اب جانچ بھی چل رہی ہے۔آندھرا پردیش کے سریکاکلم ضلع میں پیر کو عوامی نل پر جب خواتین پانی بھر رہی تھیں، تو لائن ٹوٹنے کے چکر میں خواتین کے دو گروپ میں جھگڑا ہو گیا۔اس دوران 38 سال کی تاتی پڈی پدما پر کچھ خواتین نے حملہ بولا اور ان کی موت ہو گئی۔عینی شاہدین کے مطابق، خواتین کے گروپ نے تاتی پڈی پدما پر اسٹیل کے برتن سے حملہ کیا گیا تھا جس کی وجہ سے اس کی موت ہوئی ہے۔علاقائی پولیس نے عینی شاہدین کے حوالے سے کہا کہ دقت تب شروع ہوئی، جب نل پر کچھ خواتین نے لائن کو توڑ دیا،پدما اپنی باری کا انتظار کر رہی تھی، اس نے اسے لے کر اعتراض کیا، بس یہی جھگڑے کی وجہ بنا،اسے لے کر کہا سنی ہوئی، جس کے بعد کچھ خواتین نے اس پر حملہ کر دیا،پدما کو سر میں چوٹ آئی اور اس موقع پر ہی موت ہو گئی۔اب تک اس معاملے میں پولیس نے ایک خاتون کو حراست میں لیا ہے، جس کی شناخت سدرمما کے طور پر ہوئی ہے۔غور طلب ہے کہ آندھرا پردیش کے مختلف علاقے مانسون کی تاخیر کی وجہ سے پینے کے پانی کی کمی کا سامنا کر رہے ہیں۔ریاست میں مانسون کی تاخیر کی وجہ سے اہم ذخائر میں پانی کی سطح گر گئی ہے۔غور طلب ہے کہ اس وقت ملک کے کئی حصوں میں سیلاب کی صورتحال بن رہی ہے تو وہیں کچھ ضلع ایسے ہیں جو پینے کے پانی کے لئے ترس رہے ہیں،پھر چاہے وہ آندھرا پردیش ہو یا پھر چنئی، ہر جگہ پینے کے پانی کا بحران ہے جو عام لوگوں کے لئے تشویش بنتا جا رہا ہے۔