کانگریس اقتدار میں آتے ہی سی اے اے ختم کردے گی ؛ کانگریس کے سینئر ترجمان پون کھیڑا کا اعلان
نئی دہلی، 7/مارچ (ایس او نیوز/ایجنسی) مرکز کی مودی حکومت بھلے ہی الیکشن سے قبل شہریت ترمیمی قانون یعنی سی اے اے نافذ کرنے کے لئے پرتول رہی ہے لیکن کانگریس پارٹی نے اعلان کیا ہے کہ وہ اقتدار میں آتے ہی اس سیاہ قانون کو منسوخ کردے گی۔ پارٹی کے سینئر ترجمان پون کھیڑا نے پریس کانفرنس کے دوران یہ اعلان کیا اور کہا کہ سی اے اے کے خلاف ماضی میں بہت شدید احتجاج ہو چکا ہے اور اس کی وجہ سے شہریوں میں بے چینی بھی پائی جارہی ہے اس لئے کانگریس پارٹی اس قانون کو منسوخ کردے گی۔
پون کھیڑا نے اس قانون کو منسوخ کرنے کی اصل وجہ یہ بیان کی کہ سی اے اے سے قبل آسام میں داخل ہونے والے بنگلہ دیشیوں کو شہریت دینے کے لئے کٹ آف تاریخ ۱۹۷۱ء کی تھی جو کہ بالکل مناسب تھی اور اس سے یہ بات یقینی ہورہی تھی کہ اصل حقداروں کو ہی شہریت دی جائے گی لیکن سی اے اے کی وجہ سے یہ کٹ آف تاریخ ۲۰۱۴ء ہو جائے گی جو آسام میں آبادی کا تناسب بگاڑ دے گی۔پون کھیڑا نے اس دوران وزیر اعظم مودی کو تنقیدوں کا نشانہ بنایا اور پوچھا کہ منی پور میں اتنا تشدد ہونے کے باوجود وہ اب تک منی پور کیوں نہیں گئے ؟