کولکاتہ، 3/مئی (ایس او نیوز) مغربی بنگال کے اسمبلی انتخابات میں ایک طرف ممتا بینرجی کی   ترنمول کانگریس نے 213 سیٹوں پر زبردست کامیابی درج کرتے ہوئے  بی جے پی کے پورے کھیل کو بگاڑ کر رکھ دیا ہے وہیں دوسری طرف ممتا بنرجی  جنہیں الیکشن کمیشن سے پہلے 1200 ووٹوں سے جیت جانے کا اعلان کیا ہے، بعد میں اچانک  اپنا اعلان تبدیل کردیا اور کہا کہ  اس سیٹ پر بی جے پی کے سووندو ادھیکاری 1900 ووٹوں سے جیت گئے ہیں۔  نندی گرام  کے نتیجہ کو لے کر ممتا نے   ووٹوں کی دوبارہ گنتی کا مطالبہ کیا ہے اور اخبار کو بیان دیتے ہوئے انہوں نے دعوی کیا ہے کہ وہ  اس سیٹ سے ہاری نہیں ہیں۔

یاد رہےکہ  ممتا  نے اپنا پرانی  اسمبلی نشست بھونی پورا   کو  چھوڑ کر ان کے معتمد خاص سووندوادھیکاری کے خلاف نندی گرام میں   الیکشن  میں کھڑے ہونے کا فیصلہ کیا تھا،ممتا کے خاص الخاص مانے جانے والے سووندو ادھیکاری کے   بی جےپی  جوائن کرنے کے بعد سمجھا جارہا تھا کہ  اس سے پارٹی کو کافی نقصان ہوگا ، مگر ممتا  کی ہمت کی داد دینی چاہئے  کہ انہوں نے اپنا حلقہ چھوڑ کر   سووندو ادھیکاری کے  خلاف انتخابی اکھاڑے میں اُترنے کا فیصلہ کیا۔

یاد رہے کہ نندی گرام  مغربی بنگال کی سب سے بڑی ہائی پروفائل سیٹ ہے، یہاں  ممتا کی پارٹی کو چھوڑ کربی جے پی میں شامل ہونے والے  ممتا کے ہی   معتمد خاص    سووندو ادھیکاری  کھڑے تھے جو یہاں ہمیشہ جیت درج کرتے آرہے تھے،  لیکن ممتا نے  سووندو ادھیکاری کو  سبق سکھانے کے لئے خود اس اسمبلی نشست سے انتخاب لڑنے کا فیصلہ کیا اور     ایسی سخت ٹکر دی کہ   بی جے پی کے  اب ہوش اُڑگئے  تھے۔

کہا جارہا تھا  کہ اس سیٹ کو حاصل کرنے کے لئے بی جے پی نے  ایڑی چوٹی کا زور لگایا ،امیت شاہ کے ساتھ ساتھ ادتیہ ناتھ یہاں تک کہ  خود وزیراعظم مودی بھی   ممتا کو ہرانے میدان میں اُتر گئے تھے اور سووندو ادھیکاری کے لئے پرچار کیا تھا۔ اتنا ہی نہیں  انتخابات کے موقع پر اس با ت کی بھی باتیں سامنے آرہی تھی کہ ممتا کو شکست دیتے  نندی گرام میں سنٹرل سیکورٹی فورس کو تعینات کردیا  ہے، الیکشن کمیشن پر  ناانصافی کرنے کا بھی الزام لگا اور  یہاں تک کہا گیا کہ  بی جے پی اور آر ایس ایس کارکنان کی فوج کے ساتھ ساتھ دنیا کی ہر دولت ممتا کے خلاف جھونک دی گئی تھی ۔ انتخابات کے دوران   ممتا نے الزام  لگایا تھا  کہ ووٹنگ کے دوران بی جے پی کارکنان   بوتھ پر قبضہ کر کے  دھاندلیاں   کررہے ہیں۔بتایا گیا تھا کہ  ممتا بنرجی بذات خود بویل نامی ایک بوتھ پر پہنچ گئیں تھی  جہاں بی جے پی کارکنان نے ان کو گھیر لیا تھا۔ ذرائع کی مانیں تو اکیلے نندی گرام میں ممتا کے کارکنان نے چناؤ کی خلاف ورزی کے 63 معاملات الیکشن کمیشن  میں درج کئے  تھے ، لیکن  ایک بھی شکایت پر کان نہیں دھرنے کا بھی  الزام تھا، ان سب کے باوجود جب  ممتا کی جیت کا اعلان ہوا تو ظاہر بات ہے کہ مخا لف خیمے والوں کے ہوش اُڑگئے ہوں گے۔مگر پھر الیکشن کمیشن نے اپنا سابقہ اعلان  تبدیل کردیا اور دوسرا اعلان کیا کہ  ممتا کے خلاف بی جے پی کے سووندو ادھیکاری جیت گئے ہیں۔ ویسے تو ممتا نے  ووٹوں کی دوبارہ گنتی کا مطالبہ کیا ہے، اب یہ دیکھنا دلچسپ ہوگا کہ  آگے کیا ہوتا ہے۔

میڈیا رپورٹوں  کے مطابق مغربی بنگال میں   ممتا بنرجی کی  ترنمول کانگریس کو  213  جبکہ  بی جے پی کو 77  سیٹیں حاصل ہوئی ہیں۔