رام نگر،3؍ستمبر (ایس او نیوز) شہر رام نگرمیں حالیہ برسات کی تباہی کے بعد بہت ساری ریلیف تنظیموں نے بڑھ چڑھ کر حصہ لیا ہے جس میں جمعیت علماء ہند، ایس ڈی پی آئی،پاپولر فرنٹ آف انڈیا، ایچ آر ایس کرناٹک اور دوسری مسلم تنظیمیں قابل ذکر ہیں۔ جہاں تک سرکاری وعدوں کی بات ہے ابھی تک کسی بھی قسم کی کوئی مدد سرکار کی طرف سے نہیں آئی ہے۔ کئی لیڈروں نے دورہ کیا اور چلے گئے یہاں تک کہ وزیر اعلیٰ نے بھی دور ہ کیا صرف زبانی جمع خرچ کے علاوہ کچھ نہیں کیا۔ ابھی تک کوئی سرکاری نمائندہ ان علاقوں کا دورہ کرنا تک گوارا نہیں کیا۔ بجلی پوری طرح سے منقطع ہے۔ چھ دن گذر چکے ہیں مگر ابھی تک بجلی اور پانی کی فراہمی بحال نہیں ہو پائی ہے۔ اگر اس علاقے میں مسلم تنظیمیں اگر نہ آئی ہوتیں تو یہاں کے عوام برسات کی بربادی سے نہیں بلکہ یہاں کی گندگی کی وجہ سے دم توڑ چکے ہوتے۔ یہی خیالات اس علاقے کے لوگوں میں پائے جاتے ہیں۔ ایک طرف تو وہ سرکار سے بد ظن ہوچکے ہیں اور دوسری طرف ہمارے مسلم لیڈروں کے رویہ سے بھی مایوس ہوچکے ہیں۔کیونکہ ابھی تک کسی مسلم لیڈر نے بھی دور ہ نہیں کیا ہے اس علاقے کے عوام سخت ناراض ہیں۔