بیلگاوی کے سورنا سودھا میں چاروں دروازے بند کرکے نصب کی گئی ساورکر کی تصویر؛ کانگریس نے کیا احتجاج؛ کیا کانگریس ٹیپو سلطان کی تصویر نصب کرے گی ؟
بیلگاوی،20؍دسمبر (ایس او نیوز) بیلگاوی کے سورنا ودھان سودھا میں سرمائی اسمبلی سیشن کے پہلے دن ہی ویرساور کر کی تصویر کی نقاب کشائی کی گئی۔ جس کے دوران اسمبلی کے تمام چاروں دروازے بند کردیئے گئے تھے تاکہ کسی بھی کی کوئی رکاوٹ نہ ہو۔ گویا یہ پوری تقریب خفیہ طریقہ سے کی گئی۔کہا جارہا ہے کہ آزاد ہندوستان کی تاریخ میں پہلی بار کسی اسمبلی ہال میں ویرساورکر کی تصویر آویزاں کی گئی ہے۔
ساورکر کی تصویر نصب کرنے پر کانگریس نے ریاستی بی جے پی حکومت کے خلاف احتجاج بھی کیا، مگر بی جے پی ارکان اسمبلی نے اپوزیشن کی ایک نہ سنی ۔ میڈیا ذرائع کے مطابق سورنا سودھا کے اسمبلی ہال میں ساورکر کی تصویر اب 7مجاہد آزادی کے درمیان آویزاں کی گئی ہے۔ ساورکر کی یہ تصویر اسمبلی ہال میں کانگریس لیڈروں اورلجس لیٹرس کی غیر موجودگی میں لگائی گئی۔ اس موقع پر وزیراعلیٰ بسو راج بومئی، اسمبلی اسپیکر ویشویشور ہیگڈے کاگیری، ویزر قانون جے مادھو سوامی، وزیرآبی وسائل گووند کارجول اور دیگر حاضر رہے۔
ذرائع کے مطابق جس وقت اسمبلی ہال میں ویر ساورکر کی تصویر کی نقاب کشائی عمل میں آئی، اس تصویر کو لگائے جانے کے خلاف کانگریس کے احتجاج پر بی جے پی ایم یل سی روی کمارنے یہ کہتے ہوئے اعتراض کیا کہ آزادی کی جنگ صرف کانگریس لیڈروں اور نہرو نے نہیں لڑی تھی۔ روی کمار نے دعویٰ کیا کہ ویر ساورکر نے ملک کے پوری انقلابی نسل کو ترغیب دلائی تھی۔ انہوں نے سوال کیا کہ اس مجاہد آزادی کی تصویر لجس لیٹیو اسمبلی، پارلیمان اور عوامی مقامات میں نہیں تو کہاں ہونی چاہئے۔
جب کانگریسی لیڈران نے کہا کہ ساورکر کی تصویر لگانے پر اب شیر میسور ٹیپو سلطان کی بھی تصویر بھی اسمبلی ہال میں نصب کریں گے، روی کمار نے کہاکہ ٹیپوسلطان مندروں کو مسمار کرنے والے سلطان ہیں۔ انہوں نے کنڑا کی جگہ فارسی زبان نافذ کرنے کی کوشش کی۔ وہ بنگلورو کے بانی کیمپے گوڈا اورکوئمپو کے اصولوں کے خلاف تھے۔ انہوں نے کہاکہ ودھان سودھا دور کی بات ہے۔ ہم کسی بھی مقام پر ٹیپو سلطان کی تصویر لگانے کی اجازت نہیں دیں گے۔
بی جے پی کے رکن اسمبلی بسون گوڈا پاٹل یتنال نے کہاکہ کانگریسی لیڈر یہ بھول گئے ہیں کہ آنجہانی وزیر اعظم اندرا گاندھی نے ویر ساورکر کا پوسٹل اسٹامپ جاری کروایا تھا۔ کسی بھی عوامی مقام پر ہم ٹیپو سلطان کی تصویر لگانے نہیں دیں گے۔ وہ کٹر پسند مسلم سلطان تھے۔ اس معاملہ پر تبصرہ کرتے ہوئے کے پی سی سی صدر ڈی کے شیوکمار نے ایک بیان میں کہاکہ کرناٹک اورویرساورکر کا کیا تعلق ہے؟ اس پر بی جے پی رکن اسمبلی ایشورپا نے سوال کیا کہ کرناٹک اور راہل گاندھی، سونیا گاندھی کا کیا تعلق ہے؟۔ شیوکمار پر طنز کرتے ہوئے ایشورپا نے کہاکہ شیوکمار کو صرف تہاڑ جیل اور بنگلورو سنٹرل جیل کا علم ہے۔ سلیولر جیل اور انڈومان میں جنگ آزادی کے مجاہدین کو کتنی سخت سزائیں دی جاتی تھیں،شیوکمار کو اس کا مطالعہ کرنے کی ضرورت ہے۔
