اتر پردیش: سڑک حادثے میں 8 بچوں سمیت کل 9 افراد ہلاک، 15 زخمی
نئی دہلی،22/جولائی (ایس او نیوز/ آئی این ایس انڈیا) اتر پردیش کے ہاپوڑ علاقے میں ایک سڑک حادثہ میں آٹھ بچوں سمیت کل نو افراد کی موت ہو گئی۔واقعہ ہاپوڑ کے حفیظ پور علاقے میں ہوا۔ واقعہ میں بہت سے لوگ شدید زخمی بھی ہوئے ہیں۔حادثے کی معلومات ملنے کے بعد پولیس نے تمام زخمیوں کو قریبی اسپتال میں داخل کرا دیا ہے۔جبکہ مرنے والوں کی لاش کو قبضے میں لے کر پوسٹ مارٹم کے لئے بھیج دیا گیا ہے۔اس پورے واقعہ پر اتر پردیش کے وزیر اعلی یوگی آدتیہ ناتھ نے افسوس ظاہر کیا ہے۔معاملے کی تحقیقات کر رہے ایک سینئر پولیس افسر نے بتایا کہ اتوار کی رات دھولانا کے گاؤں سالح پور کوٹلہ کے حاجی مہربان کی بیٹی کا نکاح ہاپوڑ میں بلند شہر روڈ پر واقع ونش گارڈن میں ہو رہا تھا۔بارات میرٹھ آئی تھی۔شادی کی تقریب کے لئے آئے لوگ اتوار کو نکاح کی رسم پوری ہونے کے بعد واپس لوٹنے لگے۔ایک پک اپ گاڑی میں بھی کچھ لوگ سالے پورکوٹلہ واپس آ رہے تھے۔رات تقریباََسوا 11 بجے پک اپ گاڑی تھانہ حفیظ پور کے تحت گاؤں سادق پور کے پاس پہنچی ہی تھی اسی دوران مخالف سمت سے آ رہے ایک منی ٹرک نے پک اپ گاڑی کو ٹکر مار دی۔ٹکر اتنی زبردست تھی کہ پک اپ گاڑی کے پرکچھے اڑ گئے اور اس میں سوار لوگ شاہراہ پر بکھر گئے۔ٹکر مارنے کے بعد ملزم ڈرائیور منی ٹرک کو لے کر وہاں سے فرار ہو گیا۔پولیس کے مطابق مرنے والوں میں 8 بچوں کی عمر 8 سے لے کر 14 سال کے درمیان ہے جبکہ ایک نوجوان کی عمر تقریبا 20 سال ہے پولیس نے لاش پوسٹ مارٹم کے لئے بھیج دیا۔پیر کی صبح حکام کی موجودگی میں لاشوں کا پوسٹ مارٹم کرواکر پولیس کی حفاظت میں گاؤں بھیجا گیا۔ واقعہ کو لے کر ڈی ایم ادتی سنگھ نے حادثے پر افسوس کا اظہار کرتے ہوئے کہا کہ مرنے والوں کے اہل خانہ کی اقتصادی مدد کے لئے حکومت کو خط بھیجا جائے گا اور زخمیوں کا علاج چل رہا ہے۔ریاست کے وزیر اعلی یوگی آدتیہ ناتھ نے حادثے پر افسوس کا اظہار کرتے ہوئے زخمیوں کے مناسب علاج کے لئے حکام کو ہدایات دی ہیں۔پولیس فی الحال ملزم ٹرک ڈرائیور کوتلاش کر رہی ہے۔