بنگلورو،یکم جون (ایس او نیوز) کرناٹک میں کورونا وائرس کے 299 نئے معاملات کی نشاندہی کے ساتھ ریاست میں اب تک اس وائرس کی زد میں آنے والوں کی تعداد 3 ہزار سے متجاوز ہوگئی۔ ریاست کے مختلف کووڈ مراکز میں 3 ہزار 221 متاثرین کا علاج ہوا ہے۔ ان میں سے 1218 کو رخصت کیا جاچکا ہے۔ جبکہ 1950 مختلف اسپتالوں میں زیر علاج ہیں۔ کورونا وائرس کے سبب ریاست میں 2 اور لوگوں کی موت ہوئی ہے جس کے ساتھ اب تک ریاست میں فوت ہوائے افراد کی تعداد 51 تک پہنچ چکی ہے۔ زیر علاج افراد میں 15 کا علاج آئی سی یو میں جاری ہے۔

اتوار کے روز جو نئے معاملات سامنے آئے ، ان میں سب سے زیادہ رائچور ضلع سے 83 رہے۔ یادگیر سے 44، بیدر سے 33، کلبرگی سے 28، وجئے پورہ سے 26، بنگلورو 21، دکشن کنڑا سے 14، بیلگاوی سے 13، اُتر کنڑا سے 5، بیلاری اور کولار سے ایک ایک معاملہ شامل ہے۔

رائچور سے ایک 50 سالہ مریض 257 جو مہاراشٹرا سے لوٹا تھا اور کوارنٹائن کیا گیا تھا، اس میں کورونا وائرس کی تصدیق ہوئی ، دوران علاج سانس لینے کا نظام ناکارہ ہوجانے کے سبب اس کی موت ہوگئی ۔ بیدر میں ایک 75 سالہ مریض نمبر 2965 جسے سانس لینے میں تکلیف پر کووڈ اسپتال میں داخل کروایا گیا تھا۔ اس کی موت بھی ہوگئی ۔ بنگلورو اربن سے جو نئے معاملات سامنے آئے ہیں، ان میں سے 4 دیور جیون ہلی سے تعلق رکھتے ہیں جو مریض  نمبر 2180 سے رابطے کے سبب کورونا میں مبتلا پائے گئے ہیں۔

بنگلورو میں کوروناسے متاثر ہونے والے افراد کو علاج کیلئے وکٹوریہ اسپتال میں داخل کروایا گیا ہے اور ان تمام کو جن علاقوں سے لا یا گیا ہے، ان علاقوں کو سیل ڈاؤن کرنے کیلئے ہدایت جاری کی جاچکی ہے۔ حکام نے اندیشہ ظاہر کیا ہے کہ پچھلے 2 دونوں سے بنگلورو میں سامنے آنے والے 50 سے زائد متاثرین کے بنیادی رابطے  میں آنے والوں کے ٹیسٹ کے بعد بنگلورو میں کورونا وائرس متاثرین کی تعداد میں اور بھی ازیادہ اضافہ ہوسکتا ہے۔