ٹمکور میں ایک بائک کو مار کر فرار ہونے والے ٹریکٹر کو روکنے کی کوشش میں دوسری بائک بھی حادثے کا شکار؛ دونوں بائک سوار ہلاک
ٹمکور 8 جون (ایس او نیوز) ایک بائک کو ٹکر مار کر فرار ہونے کی کوشش میں جب دوسری بائک نے ٹریکٹر کا پیچھا کرتے ہوئے اُسے روکنے کی کوشش کی تو وہ بائک بھی ٹریکٹر کی زد میں آگئی جس کے نتیجے میں دوسری بائک پر سوار شخص بھی ہلاک ہوگیا۔ واردات منگل رات کو ٹمکور کے پاوگڑھ تعلقہ میں پیش آئی۔
ذرائع سے ملی اطلاع کے مطابق منگلواڑا کی طرف جانے والی بائک اور آرسیکیرے کی طرف جانے والی ٹریکٹر، تُمکونٹے گیٹ کے قریب ایک دوسرے سے ٹکراگئیں۔ ٹکر لگتے ہی بائک سوار جس کی شناخت نرسمہا مورتی (45) کی حیثیت سے کی گئی ہے، موقع پر ہی ہلاک ہوگیا۔ حادثے کے بعد ٹریکٹر سوار جب اپنی گاڑی روکے بغیر آرسیکیرے کی طرف بڑھنے لگا تو پیچھے سے آنے والے ایک بائک اس کے پیچھے لگ گئی اور ٹریکٹر کو روکنے کی کوشش کی، مگر اس کوشش میں پٹرول پمپ کے قریب رُکی ہوئی ٹریکٹر سے بائک سوار نے پیچھے سے ٹکر دے ماری جس کے نتیجے میں اس بائک پر سوار شخص تمیّا (45) بھی اپنی جان سے ہاتھ دھو بیٹھا۔ بائک کی پچھلی سیٹ پر سوار دوسرا شخص تیپّے سوامی حادثے میں شدید زخمی ہوگیا ہے اور اسے قریبی اسپتال لے جایا گیا ہے۔
واقعے کی اطلاع ملنے پر پولس جائے وقوع پر پہنچی اور جائے واردات کا جائزہ لینے کے بعد قانونی کاروائی شروع کی۔
