دہلی کی سیرکیلئے سیاحوں کو ملے گی’کرایے کی بائیک‘، سرکاربنارہی ہے منصوبہ
نئی دہلی، 17 جنوری (آئی این ایس انڈیا) قومی دارالحکومت میں سیاح جلد ہی ’کرایے کی بائیک‘ کے ذریعہ دہلی کی سیرکرسکیں گے۔ دراصل دہلی حکومت کا محکمہ ٹرانسپورٹ شہر میں موٹرسائیکل کرایہ کی خدمات شروع کرنے کے لئے لائسنس جاری کرنے کے منصوبے کو مستحکم کرنے میں مصروف ہے۔
عہدیداروں نے یہ اطلاع دی۔محکمہ ٹرانسپورٹ کے ایک سینئر عہدیدار نے بتایا کہ امکان ہے کہ مسودہ منصوبہ آئندہ ہفتے وزیر ٹرانسپورٹ کو مزید بحث کے لئے پیش کیا جائے گا۔ انہوں نے بتایاکہ یہ پیش کش اس ماہ کے آغاز کے لئے تھی لیکن اس کو ملتوی کردیا گیا۔ کرایے پر موٹرسائیکل سروس کے تجویز کے مسودے میں اسٹیٹ ٹرانسپورٹ اتھارٹی کی منظوری درکار ہوگی۔
عہدیدار نے بتایا کہ مجوزہ اسکیم میں ان درخواست دہندگان کو لائسنس دیا جاسکتا ہے جن کے پاس ضروری اجازت نامے اور انشورنس کور کے ساتھ کم از کم پانچ بائیک ہوں اور گاڑیوں کی مرمت اور بحالی کے لئے مضبوط مالی حالت ہو۔ نیز اسٹیبلشمنٹ کا موثر انتظام ہونا چاہئے۔عہدیداروں نے بتایا کہ یہ لائسنس پانچ سال کے لئے دیئے جائیں گے۔ انہوں نے بتایا کہ موٹر سائیکل کو صحیح طریقے سے مینج نہیں رکھنے اور صارفین کے ساتھ بد سلوکی کرنے کی صورت میں لائسنسنگ اتھارٹی کو آپریٹر کا لائسنس معطل کرنے کا اختیار حاصل ہوگا۔