کووڈ کی تیسری لہر پر قابوپانے کیلئے ٹھوس اقدامات کئے جائیں: ڈپٹی کمشنر آ رلتا
بنگلورو، 8؍جنوری (ایس او نیوز)ضلع بھر میں کوروناویکسین کا دوسرا ڈوز دینے میں بھی صد فیصد کامیابی حاصل کرنی ہوگی۔اگلے دو تین دنوں میں دوسرے ڈوز لینے والے جتنے بھی افراد باقی ہیں ان سب کو طلب کرکے ٹیکے لگائیں اور کورونا کی پہلی او ردوسری لہر کے دوران جس طرح سخت اقدامات کئے گئے تھے،ٹھیک اسی طرح اس مرتبہ بھی اقدامات کئے جائیں۔ یہ بات ڈپٹی کمشنر آ رلتا نے یہاں کے ضلع انتظامیہ بھون میں کووڈپر قابو پانے اورویکسی نیشن کے سلسلہ میں جائیزہ لینے کیلئے طلب کردہ اجلاس میں کہی۔
انہوں نے بتایا کہ شہر بنگلور ہمارے شہر کی سرحد سے بہت قریب ہے ہر روزبنگلو ر آنے جانے والے افراد کی تعداد بھی زیادہ ہے۔کئی افراد روزگار اور بزنس کیلئے بنگلور آتے جاتے ہیں، اس لئے ان سب پر گہری نظررکھنی چاہئے۔اگر ضرورت پڑی تو کووڈ ٹسٹ بھی کرایاجاناچاہئے۔ انہوں نے کہا کہ طے کئے گئے نشانہ کے ساتھ صد فیصد کووڈ ٹسٹ بھی کیا جانا چاہئے۔ ضلع و تعلقہ سطح کے افسر چوکنا رہیں اور گرام اور وارڈ سطح کی ٹاسک فورس بھی چوکنا رہے۔ حکومت نے 4/اور6جنوری کو جو ہدایات دی ہیں ان پر عمل پیرا ہونے کی جانب توجہ دیں۔ کووڈ کے سرکاری اسپتالوں میں کووڈ سے متاثر ہونے والے افراد کی صحت یابی کیلئے توجہ دینی چاہئے۔اس کیلئے بستروں، آکسیجن سلنڈرس، وینٹی لیٹرس، دواؤں کے بھی بہتر انتظامات کرنے کی جانب توجہ دیں۔ کورونا سے متاثر افراد کی بہتر صحت یابی کیلئے اقدامات کئے جانے چاہئیں۔ ہر تعلقہ میں 50بستروں والے کووڈ کیئر سنٹرس بھی تیار رکھنے چاہئیں۔
آ رلتا نے بتایا کہ تیسری لہر بھی تیزی کے ساتھ پھیلنے والی ہے مگر نقصان دہ نہ ہونے کے آثار ہیں۔ صر ف کم تعداد کے افراد ہی اس سے متاثر ہوں گے۔ اس لئے کووڈ کی تیسری لہر سے متاثر ہونے والے افراد کو گھروں میں ہی آئیسولیشن کرنے کی جانب توجہ دینی چاہئے۔ ان کیلئے دوائی کٹ بھی فراہم کرکے گرام وارڈ کمیٹی کی جانب سے نگرانی ہونی چاہئے۔انہوں نے افسروں کو تاکید کی کہ ہر حال میں ضلع میں تیسری لہر آنے نہ پائے اس کیلئے ابھی سے کڑے اور سختی کے ساتھ اقدامات اٹھائے جانے چاہئیں۔ اس لئے کوروناکی احتیاطی تدابیر پر عمل کرنے کی جانب توجہ دیں۔ عوام کو چوکنا اور بیدار ی لانے کیلئے اقدامات اٹھائے جائیں۔ اگر کوئی اس میں کاہلی برتے تو ان جرمانہ عائد کیا جانا چاہئے۔ اس دوران متعلقہ افسروں کو بھی ہیڈکوارٹرس میں رہ کر انتظامات کرنے ہوں گے۔
اس موقع پر ضلع پنچایت سی ای او شیوشنکر،ا یس پی متھن کمار، ضلع ہیلتھ آفیسر ڈاکٹر اندرا کباڈے کے علاوہ تمام تعلقوں کے تحصیلدراس، تعلقہ پنچایت ایگزی کیٹیو آفیسرس، کووڈ نوڈل آفیسرس، تعلقہ ہیلتھ آفیسرس اوردیگر موجود تھے۔