گجرات کے سورت کے ایک کوچنگ سینٹر کی عمارت میں بھیانک آگ؛ 19 طلبا ہلاک، جان بچانے کیلئے چھت سے کودنے کی وڈیو ہوئی وائرل
سورت 24/مئی (ایس او نیوز) ریاست گجرات کے سورت شہر کے سرتھانہ علاقے میں جمعہ کی دوپہر کو ایک عمارت کے کوچنگ سینٹر میں اچانک آگ لگ جانے سے رات دیر گئے تک 19 طالب علموں کی موت ہوگئی ، جبکہ تقریباً 20 دیگر زخمی ہوگئے۔
بتایا گیا ہے کہ آگ دوسرے مالہ پر لگی تھی، مگر آگ سے بچنے کی کوشش میں طلبا اوپری منزل کی طرف بھاگنے لگے، تیسرے اور چوتھے مالے پر پہنچ کر جب طلبا جان بچانے کی کوشش کرنے لگے تو وہاں دھواں اس قدر پھیل گیا کہ اُنہیں سانس لینے میں دقت ہونے لگی، اسی سے پریشان طلبا کھڑکی سے باہر جھانکنے لگے، اندر موت تھی تو باہر چھلانگ لگانے کے علاوہ جان بچانے کے لئے دوسرا راستہ نہیں تھا، طلبا نے جان بچانے کے لئے کھڑکیوں سے باہر کودنا شروع کردیا، جس کی وڈیو وائرل ہوگئی۔ وڈیو میں دیکھا گیا ہے کہ بچے ایک کے بعد ایک نیچے کود رہے ہیں، ایسے میں ایک طالب العلم کھڑکی سے آہستگی کے ساتھ تیسرے مالے پر اُترکر کھڑا ہونے میں کامیاب ہوگیا، اس نے بعد میں دوسرے طلبا کو نیچے گرنے سے بچانے کی کوشش کی، مگر وہ صرف دو طلبا کو ہی بچاسکا۔
ذرائع سے ملی اطلاع کے مطابق کھڑکیوں سے کودنے والے طلبا جان بچانے میں کامیاب ہوگئے ہیں اور وہ زخمی ہوکر اسپتال میں داخل کئے گئے ہیں، البتہ جو طلبا ہلاک ہوئے ہیں، اُن کی موت آگ کی لپیٹ میں آنے سے ہوئی ہے۔
فائر بریگیڈ افسر ایشور بھائی پٹیل نے میڈیا کو بتایا کہ پانچ منزلہ ٹکشلا اکارڈ کی دوسری منزل پر چل رہے ٹیوشن کلاس میں دوپہر کو اچانک آگ لگ گئی تھی۔ اطلاع ملتے ہی فائر بریگیڈ کی 21 گاڑیوں کے ساتھ فائر بریگیڈ کے اہل کار جائے وقوع پر پہنچے۔ مگر عوام کا الزام ہے کہ فائر بریگیڈ کا عملہ کافی تاخیر سے پہنچا جس کے دوران طلبا کو جان بچانے کے لئے نیچے کودنے کے علاوہ کوئی دوسرا راستہ نہیں تھا۔
زخمی اور جھلسے ہوئے طالب علموں کو اسپتال میں بھرتی کرایا گیا ہے۔ بارہ طالب علموں کو محفوظ باہر نکال لائے جانے کی بھی خبر ہے۔
سورت کے پولس کمشنر نے ستیش کمار مشرا نے 19 طلبا کی موت کی تصدیق کی ہے، مگر انہوں نے بتایا ہے کہ مرنے والوں کی تعداد بڑھ بھی سکتی ہے۔ بتایا گیا ہے کہ جن طلبا کی موت ہوئی ہے، اُن کی لاشیں اس قدر جھلس گئی ہیں کہ شناخت کے قابل نہیں ہیں۔ ذرائع نے خبر دی ہے کہ ڈی این اے ٹیسٹ کے ذریعے ہی لاشوں کی شناخت کی جاسکے گی۔
ریاستی حکومت نے مرنے والوں کے اہل خانہ کو چار چار لاکھ روپے امدادی رقم دینے کا اعلان کیا ہے۔ وزیراعلی وجے روپانی نے جانچ کے احکامات دیئے ہیں اور تین دن میں حادثے کی رپورٹ پیش کرنے کےلئے کہا ہے۔ واقعے کے بعد وزیراعلی سورت پہنچنے والے ہیں۔
وزیراعظم نریندر مودی نے اس حادثے پر اپنے دکھ کا اظہار کرتے ہوئے کہا ہے کہ وہ دکھ کی اس گھڑی میں متاثرین کے اہل خانہ کے ساتھ ہیں اور امید کرتے ہیں کہ زخمی اور جھلسے ہوئے لوگ جلد ٹھیک ہوجائیں گے۔ انہوں نے گجرات حکومت اور مقامی افسران سے متاثرہ لوگوں کو ہر ممکنہ امداد فراہم کرنے کی ہدایت دی ہے۔
آگ لگنے کے اس حادثہ پر تعزیت کا اظہار کرتے ہوئے کانگریس کے صدر راہل گاندھی نے کہا، ’’سورت گجرات میں ہوئے حادثہ کی خبر سے دکھ پہنچا ہے۔ متاثرین کے تئیں میں گہرے سوگ اور تعزیت کا اظہار کرتا ہوں۔ زخمیوں کے جلد از جلد صحت یاب ہونے کی میں دعا کرتا ہوں۔‘‘