نئی دہلی، 21؍دسمبر (ایس او نیوز؍ایجنسی)راجستھان کے وزیر اعلیٰ اشوک گہلوت نے یکم اپریل سے ریاست کے غریب خاندانوں کو500روپے میں گیس سلنڈر دینے کا اعلان کیا ہے- گہلوت نے پیر کو یہ اعلان”بھارت جوڑو یاترا“کے تحت الور ضلع کے ملاکھیڑا میں منعقدہ ایک جلسہ عام میں کیا-کانگریس کے سابق صدر راہل گاندھی نے راجستھان کی کانگریس حکومت کی طرف سے ریاست کے لوگوں کو ایل پی جی سلنڈر500روپے میں دینے کے اعلان پر ردعمل ظاہر کیا ہے-انہوں نے ٹوئٹ کیا”راجستھان کی کانگریس حکومت کا 500روپے میں گیس سلنڈر دینے کا بڑا اعلان-مرکزی حکومت کی قیمت سے آدھی سے بھی کم، آدھی سے زیادہ کم- مودی جی، دوستوں کو میوہ کھلانا بند کیجئے، مہنگائی سے پریشان عوام کی خدمت کیجئے-“

خیال رہے کہ راجستھان حکومت نے اپنے دور اقتدار کے چار سال مکمل کر لیے ہیں - اس موقع پر ریاست کے وزیر اعلی اشوک گہلوت نے بڑا اعلان کیا ہے-انہوں نے یکم اپریل سے غریب خاندانوں کو500روپے میں گیس سلنڈر دینے کا اعلان کیا ہے- گہلوت نے پیر کو یہ اعلان ”بھارت جوڑو یاترا“کے تحت الور ضلع کے ملاکھیڑا میں منعقدہ ایک جلسہ عام میں کیا-ملک میں ایل پی جی سلنڈر کی قیمتوں میں ہوش ربا اضافہ ہوا ہے- جو سلنڈر کبھی400روپے میں دستیاب تھا، اس وقت ملک بھر میں 1000روپے سے زیادہ میں فروخت ہو رہا ہے- کولکتہ میں گھریلو گیس سلنڈر کی قیمت 1079روپے، ممبئی میں 1052.50روپے اور چنئی میں 1068.50روپے ہے- آئی او سی کے اعداد و شمار سے پتا چلتا ہے کہ دہلی میں بغیر سبسڈی کے14.2کلوگرام ایل پی جی سلنڈر کی قیمت1053.00روپے ہے-