بنگلورو،16؍مارچ (ایس او نیوز) سابق وزیراعلیٰ سدارامیا نے آج کہاکہ کرناٹک کانگریس کی یہ خواہش ہے کہ کانگریس صدر راہل گاندھی اس مرتبہ لوک سبھا کا چناؤ جنوبی ریاست سے لڑیں۔ راہل کو ہندوستان کے اگلے وزیراعظم قرار دیتے ہوئے کانگریس لجس لچر پارٹی لیڈر نے راہل کی دادی اندراگاندھی اور ماں سونیا گاندھی کی یاد تازہ کی۔ جنہوں نے ماضی میں کرناٹک سے لوک سبھا کا چناؤ لڑا اور کامیاب رہے۔ سدارامیا نے اپنے ٹویٹ میں کہا ہے کہ کرناٹک نے ہمیشہ کانگریس کی تائید اور حوصلہ افزائی کی ہے۔ یہ اندرا گاندھی اور سونیا گاندھی کے معاملہ میں ثابت ہوچکاہے۔ ہم بھی یہ چاہتے ہیں کہ ہمارے ملک کے اگلے وزیراعظم راہل گاندھی اس مرتبہ کرناٹک سے چناؤ لڑکر ایک تاریخ رقم کریں۔ سدارامیا نے بتایا کہ جب اندرا گاندھی کو 1978میں سیاسی بحران کا سامنا تھا تو انہوں نے کرناٹک کے چک منگلور حلقہ سے چناؤ لڑکر کامیابی حاصل کی تھیں۔ اسی طرح یو پی اے کی چیرپرسن سونیاگاندھی 1999میں بلاری سے چناؤ لڑکر بی جے پی کی اہم لیڈر سشما سوراج کو ہرایا تھا۔ دلچسپ بات یہ ہے کہ اس مرتبہ کانگریس نے چک منگلور کی سیٹ مخلوط ساجھیدار جے ڈی ایس کے لئے چھوڑ دی ہے جب کہ بلاری حلقہ قدیم پارٹی کانگریس ہی کے پاس ہے۔ سدارامیا نے اس وقت یہ ٹویٹ کیا ہے جب کانگریس کے درمیان یہ دباؤ ہے کہ راہل گاندھی جنوبی ہند کی کسی سیٹ سے چناؤ لڑیں۔ رواں ماہ کے آغاز میں کانگریس نے یہ اعلان کیا تھا کہ پارٹی صدر امیٹھی حلقہ سے اور سونیا گاندھی رائے بریلی سے چناؤ لڑیں گے۔ یہ دونوں حلقے اترپردیش میں پارٹی کے روایتی مضبوط قلعے ہیں۔ اپنے پوتے پرجول ریونا کو اپنا حلقہ انتخاب چھوڑ کر دیتے ہوئے بنگلور نارتھ پارلیمانی حلقہ سے انتخاب لڑنے کا ارادہ بنانے والے دیوے گوڑا کی جیت کے لئے تمام کانگریس قائدین مل کر کوشش کریں گے۔ کانگریس اراکین اسمبلی جہاں زیادہ تعداد میں ہیں وہ حلقہ جے ڈی ایس کے حصہ میں آیا ہے۔ اس سلسلہ میں اس لوک سبھا حلقہ میں امیدوارکی تائید وحمایت میں کس قسم کی تشہیری مہم شروع کی جانی چاہئے۔ آج کانگریس اور جے ڈی ایس کے قائدین کے درمیان بات چیت کی گئی۔ اجلاس کے بعد انہوں نے کہاکہ کس حلقہ میں مخلوط امیدوار کون ہوں گے۔ ہائی کمان سے ہمیں اطلاع مل جائے گی۔ اگر دیوے گوڑا امیدوار بنتے ہیں ان کی جیت کے لئے ایڑی چوٹی کا زور لگائیں گے لیکن اب تک اس حلقہ کی امیدواری طے نہیں ہوئی ہے۔ اگر دیوے گوڑا کے علاوہ دیگر کوئی امیدوار بنتا ہے تو کیسی کوشش کی جائے گی اس بارے میں بھی غورکیاگیا۔ اس موقع پر راہل گاندھی کو کرناٹک سے امیدوار بنائے جانے کے معاملہ پر بھی غور کیاگیا۔