سیوا سندھو پورٹل پر آٹو اور ٹیکسی ڈرائیوروں کو مالی امداد کا لنک غائب، کیا حکومت کی طرف سے 5ہزار روپئے مالی امداد کی اسکیم ادھوری ہی ختم کردی گئی؟
بنگلورو،4؍اگست(ایس او نیوز) ریاستی حکومت کی طرف سے کورونا وائرس سے بچنے کے لئے لاک ڈاؤن کے نفاذ کے بعد مہینوں بے روزگار ہوجانے والے آٹو رکشا اور ٹیکسی ڈرائیوروں کی مدد کے لئے انہیں 5ہزا ر روپئے کی نقد امداد دینے کا اعلان کیا۔ اب یہ بات سامنے آئی ہے کہ ریاستی حکومت نے اس اسکیم کے لئے سیوا سندھو ایپ میں جو ویب لنک فراہم کی تھی اسے ہٹا دیا گیا ہے جس کے ساتھ ہی امداد کے منتظر ڈرائیوروں کی امیدوں پر پانی پھرتا نظر آرہا ہے۔ اس اسکیم کے تحت ریاست بھر میں لاکھوں آٹو اور ٹیکسی ڈرائیوروں نے مدد کے لئے سیوا سندھو پورٹل کے ذریعے درخواست دی تھی۔ لیکن اب ایسا لگتا ہے کہ ریاستی حکومت نے ان آٹو ڈرائیوروں کی اکثریت کو مدد کرنے کی بجائے معاشی تنگی کے درمیان ان کا ہاتھ چھوڑ دیا ہے۔بتایا جاتاہے کہ ریاستی حکومت کو سیوا سندھو ایپ کے ذریعے امدا کے لئے 2لاکھ 37ہزار 313 عرضیاں موصول ہوئیں ان میں سے 937عرضیوں کو مختلف وجوہات کی بنیاد پر مستردکردیا گیا۔ اب باقی عرضیوں میں سے کتنے آٹو ڈرائیوروں کو رقم ملی اس کے بارے میں حکومت کی طر ف سے کوئی اعداد و شمار سامنے نہیں آئے ہیں۔بنگلورو سمیت ریاست بھر میں حکومت کی طر ف سے اس امداد کی امیدمیں لاکھوں کی تعداد میں آٹو اور ٹیکسی ڈرائیوروں کی طرف سے درخواست داخل کی گئی۔ بتایا جاتا ہے کہ اب تک افسروں کی طرف سے ڈرائیوروں کو یہ کہہ کر بار بار دفاتر کے چکر کاٹنے پر مجبور کیا جا رہا تھا کہ وہ اپنا لائسنسن دیں، آدھار نمبر دیں،پین کارڈ دیں،بیڈج دیں وغیرہ وغیرہ۔اسی بہانے بازی میں کافی وقت ضائع کردیا گیا۔ حالانکہ یہ اعلان کیا گیا تھا کہ حکومت کی طر ف سے آٹو اور ٹیکسی ڈرائیوروں کے لئے 387کروڑ روپیوں کی رقم جاری کی جائے گی لیکن اس میں سے صرف 60کروڑ روپیوں پر مشتمل امداد کی تقسیم عمل میں آئی ہے۔ اب یہ بات سامنے آئی ہے کہ اس اسکیم کے تحت امداد کی آس لگائے بیٹھے ڈرائیوروں کو اسکیم کے بارے میں معلومات تک رسائی کا واحد ذریعے سیوا سندھو ایپ میں اس اسکیم کے لنک کو ہی حکومت نے ہٹا دیا ہے۔آٹو ڈرائیوروں کی طرف سے یہ سوال اٹھایاجا رہا ہے کہ اس سے کیا یہ مان لیا جائے کہ یہ اسکیم ختم ہو گئی؟