خوف نہ کھائیں، اسکولوں کو آئیں۔طلبا سے بومئی کی گزارش، حکومت نے بچوں کو کووڈ سے محفوظ رکھنے احتیاطی تدابیر کی ہیں
بنگلورو،22؍اگست (ایس او نیوز) پیر سے ریاست میں اسکولس کھولے جارہے ہیں۔اس مناسبت سے وزیراعلیٰ بسوراج بومئی نے آج کہا کہ اسکولوں کو آنے والے بچوں کو کووڈ سے محفوظ رکھنے کو یقینی بنانے کے لئے حکومت نے تمام احتیاطی اقدامات کئے ہیں۔
یہاں نامہ نگاروں سے بات کرتے ہوئے بومئی نے بتایا کہ 9ویں تا 12ویں جماعت جن میں پری یونیورسٹی بھی شامل ہے،23اگست سے کلاس بحال ہوجائیں گے۔ اس کے لئے متبادل بیاچس کا اہتمام کیا گیا ہے۔اسکولوں کودوبارہ کھولنے کے لئے ہم تیار ہیں۔ بچوں کو کس طرح اسکولوں کو لانا چاہئے اس سلسلہ میں ہم نے سرکاری اور نجی اسکولوں کو مناسب ہدایات جاری کردی ہیں۔ان ہدایات میں والدین یا سرپرستوں کی منظوری، بچوں کو بٹھانے کی ترتیب، کلاسوں کومتبادل دنوں میں شفٹوں میں چلانا اور پورے کلاس رومس کو سینی ٹائزڈ کروانا یہ سب شامل ہیں۔
انہوں نے بتایا کہ ریاستی وزیر برائے پرائمری و سکینڈری تعلیم بی سی ناگیش کے ہمراہ وہ دوبارہ اسکولوں کا معائنہ بھی کریں گے۔وزیراعلیٰ نے بتایاکہ ہم چاہتے ہیں کہ بچے دھیرے دھیرے اسکولوں کو واپس لوٹ آئیں۔پچھلے ڈیڑھ سال سے بچے اسکولوں کا رخ نہیں کئے ہیں۔ہم یہ بھی چاہتے ہیں کہ اسکولوں میں بچوں کی حاضری مرحلوں میں بڑھے۔
بومئی نے بتایا کہ بچوں کو کلاس رومس میں پڑھانے کے دوران تمام احتیاطی تدابیر اپنائے جائیں تاکہ بچوں کو کورونا وباء سے محفوظ رکھا جائے۔بومئی نے والدین کو آواز دی ہے کہ خود اور بچوں کو ویکسین لگوا کر بچوں کے درمیان اعتماد پیدا کریں۔انہوں نے بتایا کہ ایک بار بچے گھروں سے اسکولوں کو آنے لگیں تو والدین ان پر نگاہ رکھیں۔آج بروز ہفتہ بومئی نے وجئے پورہ ضلع میں آلمٹی ڈیم کا معائنہ کیا اور کرشنا ندی کی پوجا بھی کی۔
انہوں نے بتایا کہ باگل کوٹ میں میں نے عوامی نمائندوں سے بھی ملاقات کرکے کووڈ۔19اور سیلاب سے متعلق تبادلہ خیال کیا۔ والدین سے بومئی نے کہا ہے کہ ڈر و خوف کے بغیر بچوں کو اسکول روانہ کریں۔حکومت آپ کے بچوں کی کووڈ سے تحفظ کرے گی۔