نئی دہلی 19 / اپریل (ایس او نیوز) ای وی ایم مشین اور وی وی پیاٹ میں درج ہوئے ووٹوں کی مطابقت جانچنے کے معاملے پر شنوائی کرتے ہوئے سپریم کورٹ نے الیکشن کمیشن سے کہا کہ انتخابی عمل میں تقدس برقرار رہنا چاہیے۔ آزادانہ اور منصفانہ انتخابی کارروائی کو یقینی بنانا چاہیے۔ اس بات کا خیال رکھا جائے کہ کل کسی کو یہ کہنے کا موقع نہ ملے کہ انتخابی عمل توقعات کے برخلاف ہو رہا ہے۔

 سپریم کورٹ میں اس وقت ای وی ایم میں ڈالے گئے ووٹوں کی گنتی اور وی وی پیاٹ پر درج ووٹوں کے ساتھ مطابقت کے لئے صد فی صد ووٹوں کی جانچ کا مطالبہ کرنے والی کئی درخواستیں داخل کی گئی تھیں جن پر سماعت مکمل ہونے کے بعد جسٹس سنجیو کھنّہ اور جسٹس دیپانکر دتا کی بینچ نے اپنا فیصلہ محفوظ رکھا ہے۔

 سپریم کورٹ کے سامنے الیکشن کمیشن کی طرف سے وضاحت کی گئی کہ کیرالہ کے کاسرگوڈ میں مشقی پولنگ کے دوران وی وی پیاٹ پر بی جے پی کے حق میں زائد ووٹ پڑنے کی جو بات میڈیا میں عام ہوئی ہے اس میں کوئی سچائی نہیں ہے۔ درخواست گزاروں کے وکیل پرشانت بھوشن کی طرف سے ای وی ایم اور وی وی پیاٹ سے متعلق الزام لگائے جانے کے بعد سپریم کورٹ نے کمیشن کو ہدایت دی کہ اس معاملے کی پوری جانچ کی جائے۔ 

 الیکشن کمیشن کی طرف سے سینئر ایڈوکیٹ منندر سنگھ نے پیروی کی جبکہ درخواست گزاروں کی جانب سے سینئر ایڈوکیٹ پرشانت بھوشن اور ایڈوکیٹ نظام پاشاہ نے پیروی کی۔