نئی دہلی،20؍ستمبر (ایس او نیوز؍ایجنسی) مودی حکومت کے زرعی اصلاح سے جڑے تین بل کی ملک بھر میں مخالفت ہو رہی ہے۔ اپوزیشن پارٹیوں کے علاوہ کسانوں نے بھی مرکزی حکومت کے خلاف محاذ کھول رکھا ہے۔ یہاں تک کہ بی جے پی کی کچھ معاون پارٹیاں بھی اس کی مخالفت کر رہی ہیں۔ تازہ ترین خبروں کے مطابق آر ایس ایس سے جڑی کسان تنظیم یعنی بھارتیہ کسان سنگھ (بی کے ایس) بھی مودی حکومت کے خلاف کھڑی ہو گئی ہے۔ بی کے ایس کے جنرل سکریٹری بدری نارائن چودھری نے کہا کہ یہ بل صنعت کاروں کو فائدہ پہنچانے والا ہے اور اس سے کسانوں کی زندگی مزید مشکل ہونے والی ہے۔

بدری نارائن چودھری کا کہنا ہے کہ بی کے ایس کسی اصلاح کی مخالفت میں نہیں ہے، لیکن اس بل میں کسانوں کو لے کر کئی فکر انگیز باتیں ہیں۔ انھوں نے 'انڈیا ٹوڈے' نیوز ویب سائٹ کو دیے ایک انٹرویو میں کہا کہ اب جس کے پاس بھی پین کارڈ ہے، وہی تاجر بن کر سیدھا کسان سے معاہدہ کر سکتا ہے۔ حکومت کو ایسا قانون بنانا چاہیے جس سے یہ طے ہو سکے کہ جب اس کا پروڈکٹ خریدا جائے گا، اسی وقت اسے پیمنٹ ہو جائے گا یا پھر حکومت اس کے پیمنٹ کی گارنٹر بنے گی۔