منڈیا: شری رنگا پٹن کی جامع مسجد میں 4 جون کو پوجا کرنے ہندو تنظیمیں بضد، بھکتوں سے کس طرح نمٹا جائے؟ ضلعی انتظامیہ کو حکومت کی ہدایت کا انتظار
منڈیا،3؍جون(ایس او نیوز) منڈیا ضلع کے تاریخی شہر شری رنگا پٹن میں حکام نے ہائی الرٹ کااعلان کرتے ہوئے پورے شہر میں دفعہ 144کے تحت امتناعی احکامات نافذ کرنے کا فیصلہ کیا ہے۔کیونکہ یہاں کی چند ہندوتنظیموں نے بروز ہفتہ 4جون کو شری رنگا پٹن کی تاریخی جامع مسجد میں داخل ہوکر وہاں پوجا کرنے کی دھمکی دی ہے۔
چند ہندو تنظیموں نے یہ بھی فیصلہ کیا ہے کہ وہ گیان واپی کی طرز پر اس مسجد کا بھی سروے کروانے کا مطالبہ کرتے ہوئے عدالت سے رجوع کریں گے۔ ان تنظیموں نے سوشیل میڈیا پر شری رنگا پٹن چلو کی آواز بھی دی ہے۔ ذرائع کے مطابق حکام کو ریاستی حکومت کی ہدایت کاانتظار ہے کہ مسجد میں داخل ہوکر پوجا کرنے کی کوشش کرنے والے بھکتوں کے ساتھ کس طرح سے نمٹا جائے۔
ضلعی انتظامیہ نے جامع مسجد کے اطراف سکیورٹی بڑھا دی ہے اور بروز جمعہ 3جون تا بروز ہفتہ 4جون امتناعی احکامات نافذ کرنے کا فیصلہ کیا ہے۔ وشوا ہندو پریشد (وی ایچ پی) اور بجرنگ دل کے لیڈر، شری رنگا پٹن چلو تحریک میں صف اول رہ کر تمام کی قیادت کررہے ہیں۔حالانکہ ان لوگوں نے ضلعی انتظامیہ سے یہ درخواست کی ہے کہ انہیں شری رنگا پٹن چلو تحریک کی اجازت دی جائے لیکن ضلعی انتظامیہ نے ان کی درخواست پر کوئی جواب نہیں دیا ہے۔ اس کے باوجود وہ اپنی ضدر پر اڑے ہوئے ہیں۔ اس مسجد کے ذمہ داروں نے شر پسندوں کی شر انگیزی سے متعلق حکام کو آگاہ کردیا ہے اور حکومت سے تحفظ کی اپیل کی ہے۔
شری رنگا پٹن کے قلعہ کے اندر واقع جامع مسجد کو مسجد اعلیٰ بھی کہا جاتا ہے جس کی 1786-87 میں حضرت ٹیپو سلطان نے تعمیر کروائی تھی۔ نریندر مودی وچار منچ نامی ایک تنظیم نے اس مسجد کا سروے کروانے حکام کو عرضداشت پیش کی ہے۔ یہ دعویٰ کیا جارہا ہے کہ ہنومان مندر کو ڈھا کر یہ مسجد تعمیر کی گئی ہے۔