مہاکمبھ میں 2لاکھ لوگوں نے کیا غسل، بھیڑ دیکھ کر اداکارہ رِچا چڈھا کو آیا غصہ، ’تبلیغی جماعت‘ کی آئی یاد
نئی دہلی،13؍ اپریل(ایس او نیوز؍ایجنسی) ہندوستان میں کورونا کی رفتار ایک بار پھر تیز ہو گئی ہے اور اس کے پیش نظر ریاستی حکومتوں نے سخت گائیڈ لائنس بھی جاری کر دیئے ہیں -
کورونا کی دوسری لہر اس لیے خطرناک بتائی جا رہی ہے کیونکہ اس وائرس کی نئی شکل نوجوانوں کیلئے بھی خطرناک ثابت ہو رہی ہے- یہی وجہ ہے کہ کئی ریاستوں میں لاک ڈاؤن جیسی پابندیاں عائد کر دی گئی ہیں، تو کئی شہروں میں باضابطہ سخت لاک ڈاؤن بھی نافذ کر دیا گیا ہے- اس درمیان ہری دوار میں چل رہے مہاکمبھ کی کچھ ایسی تصویریں اور ویڈیوز سامنے آئی ہیں جنہیں دیکھ کر لوگ حیران اور فکر مند ہیں - مہاکمبھ میں لاکھوں افراد نے ’شاہی اسنان‘ کیا جس کی تصویر اور ویڈیو پر اداکارہ رچا چڈھا نے بھی اپنا رد عمل ظاہر کیا ہے-
رچا چڈھا نے صحافی روہنی سنگھ کی ایک پوسٹ کو ’ری ٹوئٹ‘ کیا ہے جنھوں نے خبر رساں ادارہ ’اے این آئی‘ کے ایک ٹوئٹ کو شیئر کیا ہے اور جس میں بتایا گیا ہے کہ ہری دوار واقع ’ہر کی پوری گھاٹ‘ میں بڑی تعداد میں سادھو سَنت شاہی اسنان کر رہے ہیں - اس ٹوئٹ کو شیئر کرتے ہوئے روہنی سنگھ نے تبلیغی جماعت کے واقعہ کو یاد کیا ہے جب کئی بڑی ہستیوں اور میڈیا نے کورونا پھیلنے کیلئے اسے ذمہ دار ٹھہرایا تھا- انھوں نے اس تعلق سے لکھا ہے کہ اس ملک، خصوصاً میڈیا کا فرض ہے کہ وہ تبلیغی جماعت سے معافی مانگے-روہنی سنگھ کے اسی ٹوئٹ کو رچا چڈھا نے ’ری ٹوئٹ‘ کر کے مہاکمبھ کے تعلق سے اپنی ناراضگی ظاہر کی-ایک ٹوئٹر صارف نے حمایتی رخ اختیار کرتے ہوئے لکھا ہے کہ بغیر سوچے ان سب چیزوں کو فوراً روک دینا چاہیے- یہ حکومت کے ساتھ ساتھ لوگوں کو بھی سمجھنے کی ضرورت ہے-