پی ایم مودی کی تصاویر عوامی مقامات سے ہٹائی جائیں: الیکشن کمیشن کو نوٹس
ممبئی ،18/مارچ ( ایس او نیوز /ایجنسی)ایک سینئر وکیل سرودے اور ماہر ماحولیات چودھری نے الیکشن کمیشن کو بھیجے گئے قانونی نوٹس میں کہا ہے کہ آزادانہ اور منصفانہ انتخابی مہم کو یقینی بنانے کے لیے پی ایم مودی کی تصویریں عوامی مقامات سے ہٹائی جائے۔انہوں نے سرکاری اور نیم سرکاری مقامات سے پی ایم مودی کی تصاویر ہٹانے کا مطالبہ کیا ہے۔ہفتہ کو بھیجے گئے نوٹس میں وکیل نے الیکشن کمیشن سے کہا کہ وہ تمام سرکاری اور نیم سرکاری اداروں کو دفاتر، ہوائی اڈوں، ہوائی جہازوں، ریلوے اسٹیشنوں، ٹرینوں، میٹرو، بس اسٹیشنوں اور بس اسٹاپوں سے پی ایم مودی کی تصاویر ہٹانے کی ہدایت کرے۔
الیکشن کمیشن کے پروگرام کے مطابق لوک سبھا انتخابات کے ساتھ ساتھ 4 ریاستوں میں اسمبلی انتخابات ہونے ہیں اور اسمبلی سیٹوں کے لیے 26 مختلف سیٹوں پر ضمنی انتخابات ہوں گے۔غور طلب ہے کہ ملک میں لوک سبھا انتخابات کی تاریخوں کے اعلان کے ساتھ ہی ماڈل ضابطہ اخلاق نافذ ہو گیا ہے۔ ضابطہ اخلاق کے نافذ ہوتے ہی انتظامیہ ایکٹیو موڈ میں آگئی ہے۔
ضابطہ اخلاق کی پابندی کے لیے شہری اور دیہی علاقوں میں پارٹیوں اور امیدواروں کے بینرز اور پوسٹرز کو ہورڈنگز سے ہٹانے کا عمل شروع کر دیا گیا ہے۔ضلعی انتظامیہ میونسپل کارپوریشن ٹیم کے ساتھ مل کر پروموشنل مواد ہٹا رہی ہے۔ اس کے ساتھ ساتھ پارٹی اور امیدواروں کو ضابطہ اخلاق کے حوالے سے ہدایات بھی دی گئی ہیں۔