رائچور: طالبہ کی ہاسٹل میں مشتبہ موت، والدین کا جنسی ہراسانی کا الزام
رائچور، 5؍فروری (ایس او نیوز؍ایجنسی ) لنگاساگر ٹاؤن میں واقع ہاسٹل کے کمرے میں ایک 17سالہ طالبہ پُراسرار حالات میں مردہ پائی گئی۔ جس کو لے کر والدین نے الزام لگایا ہے کہ پرنسپل کی مبینہ جنسی ہراسانی اس کے لئے ذمہ دار ہے۔ والدین کا کہنا ہے کہ جنسی ہراسانی کے بعد اس کا قتل کیا گیا ہے اور بعد میں اُسے خودکشی دکھانے کی کوشش کی گئی ہے۔
ذرائع سے ملی اطلاع کے مطابق سر ایم وسویسوریا پری یونیورسٹی کالج میں زیرتعلیم لڑکی جس کی شناخت ایشوریہ کے طور پر کی گئی ہے، جمعہ کی شب کو مردہ حالت میں پائی گئی۔ وہ گیارہویں جماعت کی طالبہ تھی۔
لڑکی کے والدین اور رشتہ داروں نے پرنسپل رمیش کو اس کی موت کا ذمہ دار ٹھہراتے ہوئے ہفتہ کو کالج میں داخل ہونے کی بھی کوشش کی۔ انہوں نے یہ دعویٰ بھی کیا کہ پرنسپل اسے بار بار فون کرتا تھا۔ لنگاساگورو پولیس اسٹیشن میں پرنسپل کے خلاف کیس درج کرلیا گیا ہے۔ تحقیقات جاری ہے۔