پنجی،22؍ اپریل (ایس او نیوز؍ایجنسی)  کانگریس لیڈر اور راجیہ سبھا رکن آنند شرما نے اتوار کو کہا کہ اگر لوک سبھا انتخابات میں کانگریس کو سب سے زیادہ سیٹیں ملتی ہیں تو راہل گاندھی ملک کے اگلے وزیر اعظم ہوں گے۔شرما نے یہاں ایک پریس کانفرنس سے خطاب کرتے ہوئے کہا کہ وزیر اعظم نریندر مودی اور ان کی این ڈی اے حکومت کا وہی حال ہوگا جو 2004 میں اٹل بہاری واجپئی حکومت کا ہوا تھا اور ’انڈیا شائننگ‘ مہم کے باوجود بی جے پی ہار گئی تھی۔انہوں نے کہاکہ لیڈرطے کریں گے کہ اگلا وزیر اعظم کون ہوگا،یہ سب اس بات پر منحصر ہے کہ کون سی پارٹی آگے ہے،اگر کانگریس آگے ہے تو اگلے وزیر اعظم ہمارے چیف راہل گاندھی ہوں گے۔شرما نے کہاکہ انتخاب سے قبل اتحاد پر مشتمل ہے اور انتخابات کے بعد بھی اتحاد ہوتے ہیں،یہ سب نتائج پر انحصار کرے گا۔

موجودہ انتخابات میں بی جے پی کی کارکردگی کی پیشین گوئی کرتے ہوئے شرما نے کہاکہ یہی سوال 2004 میں بھی ہمارے سامنے رکھا گیا تھا جب اٹل بہاری واجپئی کے طور پر کہیں بہتر وزیر اعظم تھے، لیکن کیا ہوا تھا؟’بھارت ادے‘ ناکام ہو گیا تھا، وہی اب ہونے والا ہے۔انہوں نے دعوی کیاکہ میں کوئی نجومی نہیں ہوں لیکن ایک بات میں آپ سے کہہ سکتا ہوں کہ مودی وزیر اعظم نہیں بنیں گے اور بی جے پی ہار جائے گی،کانگریس کو زیادہ تعداد میں سیٹیں ملیں گی۔شرما نے کہاکہ سوال یہ ہے کہ خیال کا موضوع کیا ہے؟ کیا پی ایم لوگوں سے کچھ وعدہ کر رہے ہیں؟ کیا وزیر اعظم کو گزشتہ پانچ سالوں کے دوران اپنے کاموں کا حساب نہیں دینا چاہئے؟ ۔ انہوں نے کہا کہ 2014 میں لوک سبھا انتخابی مہم کے دوران کئے گئے وعدوں کو پورا نہ کرنے کے لئے وزیر اعظم کو معافی مانگنی چاہئے۔انہوں نے الزام لگایا کہ وزیر اعظم اور بی جے پی اپنی مہم میں جذباتی اپیلوں کا سہارا لے رہے ہیں۔شرما نے الزام لگایاکہ وہ لوگوں کے جذبات کے ساتھ کھیل رہے ہیں،یہ ایک شرم کی بات ہے،اس ملک کی تاریخ میں پہلی بار وزیر اعظم مسلح افواج کا استعمال سیاسی ایجنڈے کے لئے کررہے ہیں،اس کے لئے ان کی مذمت کی جانی چاہیے۔شرما نے کہا کہ دہشت گردی سے مقابلے کے بارے میں بی جے پی کو کانگریس کو سبق دینے کی ضرورت نہیں ہے کیونکہ ملک کی سب سے پرانی پارٹی نے اس جنگ میں دو وزراء اعظم اندرا گاندھی اور راجیو گادھی کو کھو یا ہے۔