نئی دہلی، 23 اکتوبر (آئی این ایس انڈیا)   کانگریس کے سابق صدر راہل گاندھی نے کسانوں، مہنگائی اور سرحدی مسائل سے متعلق مسائل پر مرکزی حکومت کو نشانہ بناتے ہوئے الزام لگایا کہ مرکزی حکومت ناکام تھی اور  ناکام ہے۔ انہوں نے ٹویٹ کیا کہ کسان پریشان ہیں، مہنگائی آسمان پر پہنچ گئی ہے، سرحدوں پر ہنگامہ آرائی ہے، ہندوستان اب بھی ’مہان‘ ہے لیکن مرکزی حکومت ناکام تھی اور ناکام ہے۔

دراصل دہلی کی سرحدوں پر کسان گزشتہ کئی ماہ سے زرعی قوانین کے خلاف دھرنے پر بیٹھے ہیں، جس کولے کر راہل گاندھی ماضی میں کئی بار مرکز پر حملہ کر چکے ہیں۔ کسانوں کا مطالبہ ہے کہ مودی حکومت تینوں زرعی قوانین کو واپس لے۔ اگرچہ اب تک اس مسئلے پر بات چیت کے کئی دور ہو چکے ہیں لیکن مرکزی حکومت نے کسانوں کے مطالبات کو قبول نہیں کیا۔ ایسے میں کسانوں کا احتجاج کئی مہینوں سے جاری ہے۔اس کے علاوہ راہل نے اپنے ٹویٹ میں مہنگائی کا بھی ذکر کیا ہے، ملک میں مہنگائی عروج پر ہے، پٹرول اور ڈیزل کی قیمتوں میں مسلسل اضافہ ہو رہا ہے۔ پہلی بار ملک میں پٹرول 100 روپے فی لیٹر سے زیادہ پر فروخت ہورہا ہے۔ اس کے علاوہ تہوار کے موسم کی آمد کے ساتھ ہی گروسری کی قیمتوں میں اضافہ ہونا شروع ہو گیا ہے۔ اگر رپورٹ پر یقین کیا جائے تو تقریبا تمام اشیاء بشمول چینی، تیل، پیاز اور آلوسمیت  روزمرہ کی  زندگی میں استعمال ہونے والی تمام اشیاء کی قیمتوں میں بے تحاشہ  اضافہ ہوا ہے۔