" گھوٹالہ " پر کرناٹک ہائی کورٹ کا ریمارکس ؛ کہا، یہ ’’قتل سے بھی گھناؤنا‘‘ ہے
بنگلورو، 17؍جولائی ( ایس او نیوز؍ایجنسی) کرناٹک ہائی کورٹ نے پولس سب انسپکٹر (پی ایس آئی) بھرتی گھوٹالہ کو قتل سے بھی گھناونا قرار دے کر ریاستی حکمراں بی جے پی کی پریشانیوں میں اضافہ کردیا ہے۔ ہائی کورٹ نے اس گھوٹالہ کو دہشت گردی کے مترادف قرار دیا ۔ بتایا جار۴ہا ہے کہ عدالتی تحقیقات کیلئے شور مچانے کے ساتھ، حکمراں بی جے پی کے رہنما اس کی شبیہ متاثر ہونے سے پر یشان ہیں کیونکہ عام انتخابات میں 10 ماہ سے بھی کم وقت رہ گیا ہے ۔
جسٹس ایچ پی سندیش کے ریمارکس ریاستی بی جے پی قائدین بشمول چیف منسٹر بسوا راج بومئی کیلئے شرمندگی کا باعث بن گئے ہیں جو آنے والے اسمبلی انتخابات کیلئے حکمت عملی بنانے میں مصروف ہیں ۔ جسٹس سندیش کی بینچ نے پی ایس آئی بھرتی اسکینڈل کے ملزمین کی درخواست ضمانت کی سماعت کرتے ہوۓ کہا کہ قتل کے معاملہ میں ایک شخص کی موت ہو جاتی ہے، یہاں 50,000امیدواروں کو مشکل میں ڈال دیا گیا ہے، اگر ہر بھرتی اسی انداز میں کی جاۓ تو ، کیا آپ چاہتے ہیں کہ عدالت خاموش رہے؟
بنچ نے مزید کہا کہ اسکام ’معاشرے پر پھیلائی گئی دہشت گردی ہے ‘۔ بینچ کے یہ ریمارکس اس وقت سامنے آۓ جب ملزم کے وکیل نے یہ کہتے ہوۓ ضمانت کی درخواست کی کہ اسکام قتل کا مقدمہ نہیں ہے۔ پبلک پراسیکیوٹر وی ایس ہیگڑے نے کہا کہ ایڈیشنل ڈی جی پی رینک کے ایک افسر کو گرفتار کیا گیا ہے اور یہ کیس کی سنگینی کو ظاہر کرتا ہے۔ تفتیش کہیں بھی پہنچ سکتی ہے ۔اے ڈی جی پی امرت پال، دوڈ پٹی سپرنٹنڈنٹ اور تین پی ایس آئی امید واروں کو گرفتار کیا گیا ہے اور ہزاروں کال کی تفصیلات کا تجزیہ کرنے کی ضرورت ہے۔
ہیگڑے نے مزید کہا کہ موبائل اور دیگر آلات کے ڈیٹا کی چھان بین کیلئے ایک ماہ کا وقت درکار ہے۔ انھوں نے عدالت کو یہ بھی بتایا کہ تفتیش کے دوران اب تک 2.5 کروڑ روپے کی نقدی ضبط کی گئی ہے۔ عدالت نے کیس کی سماعت 20 جولائی تک ملتوی کر دی۔ اس سے قبل جسٹس ایچ پی سندیش نے حکمراں بی جے پی کی انسداد بدعنوانی بیورو( اے سی بی ) میں تقرریوں پر سرزنش کی ۔ اس کی نشاندہی کے بعد ، اے سی بی نے بنگلورواربن ڈی سی کو بدعنوانی کے الزام میں گرفتار کیا۔
جسٹس سندیش نے کہا تھا کہ انہیں ہائی کورٹ کے جج کے ذریعہ ٹرانسفر کی دھمکی دی گئی تھی اور انھوں نے اس کی زیادہ پرواہ نہیں کی تھی ۔ انھوں نے یہ بھی کہا تھا کہ وہ دباؤ میں جھکنے کے بجاۓ اپنے فارم پر واپس جانے اور کھیتی باڑی کر نے کو ترجیح دیں گے۔