مہینے کی پہلی تاریخ کو ہی عوام کو لگا جھٹکا، ایل پی جی سلنڈر 43.50 روپے تک مہنگا
نئی دہلی، 2؍ اکتوبر(ایس او نیوز؍ایجنسی)اکتوبر کا مہینہ شروع ہوتے ہی عوام کو مہنگائی کا زبردست جھٹکا لگا ہے- ایل پی جی سلنڈر کی قیمت میں 43.50روپے تک کا اضافہ ہوا ہے- سرکاری آئل مارکیٹنگ کمپنیوں نے یکم اکتوبر سے ایل پی جی گیس سلنڈر کی قیمتوں میں اضافہ کر دیا ہے- انڈین آئل کارپوریشن نے 19کلو گرام کمرشیل گیس سلنڈر کی قیمت میں 43.50روپے فی سلنڈر تک کا اضافہ کر دیا ہے - اضافے کے بعد راجدھانی دہلی میں 19کلو گرام کمرشیل گیس سلنڈر کی قیمت 1693روپے سے بڑھ کر 1736.50روپے فی سلنڈر ہو گئی ہے-
تیل کمپنیوں نے عام آدمی کے استعمال میں آنے والے 14.2 کلو گرام کے بغیر سبسیڈی والے رسوئی گیس سلنڈر کی قیمتوں میں اضافہ نہیں کیا ہے- دہلی میں 14.2 کلو گرام بغیر سبسیڈی والے رسوئی گیس سلنڈر کی قیمت 884.50 روپے ہے- حالانکہ گزشتہ مہینے یعنی ستمبر ماہ میں تیل کمپنیوں نے گھریلو رسوئی گیس سلنڈر کی قیمت میں 25 روپے کا اضافہ کیا تھا-
دہلی میں بغیر سبسیڈی والے 14.2 کلو گرام ایل پی جی سلنڈر کی قیمت بغیر تبدیلی کے 884.50روپے، کولکاتا میں 911روپے، ممبئی میں 884.50روپے اور چنئی میں 900.50روپے فی سلنڈر ہے- لیکن 19 کلو گرام کے کمرشیل ایل پی جی سلنڈر کی قیمت میں اضافہ کے بعد دہلی میں اس کی قیمت 43.50 روپے اضافہ کے بعد 1736.50روپے، کولکاتا میں کمرشیل گیس سلنڈر کی قیمت 35 روپے اضافہ کے بعد 1805.50روپے، ممبئی میں 35.50 روپے اضافہ کے بعد 1685روپے، اور چنئی میں 36.50 روپے اضافہ کے بعد 1867.50روپے فی سلنڈر ہو گئی-