بنگلورو،26؍اپریل(ایس او نیوز) سری لنکا کے کولمبو میں پیش آئے بم دھماکوں کے بعد شہر بھر میں سخت سکیورٹی انتظامات کرنے کا فیصلہ لیا گیا ہے۔ پولیس کمشنر سنیل کمار کی قیادت میں آج اس خصوص میں مساجد ، گرجا گھروں ،مندروں اور ہوٹلوں کے علاوہ شاپنگ مالس وغیرہ کے ذمہ داروں اور سکیورٹی اہل کاروں کا اعلیٰ سطحی اجلاس منعقد ہوا۔ چونکہ کولمبو میں عبادتگاہوں اور شاپنگ مالوں کے قریب ہی بم دھماکے ہوئے تھے، اس لئے احتیاطی اقدامات کے طور پر ان مقامات پر شہر بھر میں سکیورٹی الرٹ کا فیصلہ لیا گیا ہے۔ آج منعقدہ اجلاس میں شہر کی اہم مساجد سمیت دیگر عبادتگاہوں کے سینکڑوں ذمہ داروں نے حصہ لیا ، جس میں پولیس نے عبادتگاہوں میں کئے گئے سکیورٹی انتظامات وغیرہ کی تفصیلات حاصل کیں۔ انہوں نے ذمہ داروں کو مشورہ دیا کہ وہ نجی طور پر عبادتگاہوں کے روبرو سکیورٹی انتظامات کریں اور سی سی ٹی وی کیمروں کی تنصیب یقینی بنانے کے علاوہ کبھی کسی پر شبہ ہوتو فوری طو ر پر مقامی پولیس تھانہ کو مطلع کریں ۔ شہر کے شاپنگ مالوںکے علاوہ عبادتگاہوں میں روزانہ ہزاروں افراد کی آمد ورفت ہوتی ہے اور شر پسند عناصر ہجومی مقامات کو ہی نشانہ بنارہے ہیں۔ ایسے میں ان مقامات پر احتیاطی تدابیر اختیار کرنے پر زور دیاگیا۔ کولمبو کے شانگریلا ہوٹل میں سی سی ٹی وی کیمروں کی موجودگی کے باوجود شرپسندوں نے بم دھماکے کئے تھے، جس کے پیش نظر شہر بھر کے اہم ہوٹلوں میں داخلے کے موقع پر ہی سخت جانچ کرنے اور مشتبہ افراد پر کڑی نظر رکھنے کے لئے اقدامات کئے جارہے ہیں۔ اجلاس میں اس بات پر بھی تبادلۂ خیال کیا گیا کہ تمام عبادتگاہوں کے دروازوں میں میٹل ڈیٹکٹر نصب کئے جائیں۔ پولیس نے بتایاکہ شرپسند عناصر سکیورٹی اقدامات کا جائزہ لینے کے بعد ہی دھماکوں جیسی حرکت کرتے ہیں ، ایسے میں ہر کسی کو چاہئے کہ وہ محتاط رویہ اختیار کرے۔ پولیس کمشنر نے بتایاکہ سکیورٹی کے معاملے میں پولیس کے ذریعے سخت اقدامات کئے جارہے ہیں۔ 

اسی طرح ذمہ داروں کو بھی چاہئے کہ وہ پولیس کا بھرپور ساتھ دیں۔ اور ہر بات پر پولیس پر ہی منحصر نہ رہیں۔ جتنا کچھ ہوسکے اپنی جانب سے اقدامات کئے جائیں۔ انہوںنے عوام کی جانچ کرنے والوں کو تربیت فراہم کرنے کے علاوہ افزود سکیورٹی اہلکاروں کی تعیناتی کامشورہ دیتے ہوئے کہا ہے کہ اگر کہیں پولیس سکیورٹی کی ضرورت پڑے تو مقامی تھانے سے رجوع ہوں ۔عوامی بھیڑ بھاڑ کو دیکھتے ہوئے درکار سکیورٹی انتظامات کئے جائیں گے۔ اس موقع پر اڈیشنل کمشنرس سیمنت کمار سنگھ، بی کے سنگھ، الوک کمار ، ہری شیکھرن کے علاوہ ڈی سی پی عبدالاحد ، ششی کمار، راہل کمار، کلا کرشنا سوامی، روی چننا ور، ایشا پنت اور دیگر موجود تھے۔