نئی دہلی،27؍مئی (ایس او نیوز؍یواین آئی) نریندرمودی 30مئی کو وزیراعظم کے عہدے کا حلف لیں گے۔ان کے ساتھ مرکزی وزارتی کونسل کے ارکان بھی حلف لیں گے۔راشٹر پتی بھون کے مطابق صدرجمہوریہ رام ناتھ کووند 30مئی کو شام 7بجے راشٹر پتی بھون میں منعقد ہونے والی تقریب میں مودی اور وزارتی کونسل میں ان کے رفقا کو حلف دلائیں گے۔بھارتیہ جنتاپارٹی کی قانون ساز پارٹی نے ہفتہ کو مودی کو اپنا لیڈر منتخب کیاتھا جس کے بعد قومی جمہوری اتحاد کی قانون ساز پارٹی نے بھی انھیں اپنا لیڈر منتخب کیا۔ این ڈی اے کالیڈر منتخب ہونے کے بعد مسٹر مودی نے ہفتہ کی رات کوہی صدرجمہوریہ رام ناتھ کووند سے ملاقات کرکے نئی حکومت بنانے کا دعوی پیش کیا، جس کے بعد صدرجمہوریہ نے انھیں وزیراعظم نامزد کیا اور نئی حکومت بنانے کے لیے مدعو کیا۔ساتھ ہی صدر جمہوریہ نے ان سے حلف لینے کی تاریخ اور وقت بتانے اور دیگر وزرا کی فہرست پیش کرنے کو بھی کہا۔ پارلیمان کے سنٹرل ہال میں این ڈی اے کے نومنتخب ارکان پارلیمنٹ کی میٹنگ میں بی جے پی صدر امت شاہ نے مودی کو پارلیمانی پارٹی کا لیڈر منتخب کرنے کی تجویز پیش کی۔

بی جے پی کے سینئر لیڈروں راج ناتھ سنگھ اور نتن گڈکری نے اس کی تائید کی اور اسکے بعد پارٹی کے سبھی نومنتخب ارکان پارلیمان نے ہاتھ اٹھاکر اور میزیں تھپ تھپاکر تجویز کی حمایت کی۔ مودی مسلسل دوسری بار وزیراعظم کے عہدے کا حلف لیں گے۔سال 2014میں پہلی بار وزیراعظم بنے مودی کی یہ دوسری مدت کار ہوگی۔