بیدر،25/فروری (ایس او نیوز) بیدر شہر کے تعلقہ اسٹیڈیم میں کل شام جوائنٹ ایکشن کمیٹی بسواکلیان کے زیر اہتمام مرکزی حکومت کی جانب سے نافذ کئے گئے سیاہ قوانین سی اے اے ، این آر سی ، این پی آر کے خلاف جلسہ عام منعقد ہوا۔جس میں بسواکلیان کے علاوہ ضلع بیدر ، کلبرگی ، عمرگہ ، سولہ پور، لاتو، نیلنگہ سے بھی عوام کی کثیر تعداد نے شرکت کی۔

جلسہ سے سابق وزیر اعلیٰ سدارامیا ، مجتبیٰ فاروق آل انڈیا کنوینر جوائنٹ ایکشن کمیٹی ، رچا سنگھ نے خطاب کرتے ہوئے مرکزی حکومت کی ناکامیوں پر کڑی تنقید کی۔ انہوں نے بی جے پی پر نشانہ سادھتے ہوئے کہا کہ بی جے پی اقتدار کے نشہ میں ملک کے آئین کے خلاف کام کررہی ہے، مختلف آئین مخالف قوانین کے ذریعہ ملک کی عوام کو پریشان کررہی ہے۔ سیاہ وہ آئین مخالف قوانین کے خلاف جدوجہد اس وقت تک جاری رہے گی جب تک کہ مرکزی حکومت ان سیاہ قوانین کو واپس نہیں لے لیتی ۔ہم سب کو مل کر ملک کے آئین کی حفاظت کرنی ہے۔ یہ آئین ہی کی بدولت ہے کہ ایک چائے بیچنے والا شخص وزیر اعظم کے عہدہ پر فائز ہے اور دلت ذات کے تعلق رکھنے والا شخص صدر ہند کے عہدہ پر فائز ہے، یہی ہمارے آئین کی خصوصیت ہے جو بغیر ذات پات کے تمام شہریوں کو مساوی حقوق فراہم کرتا ہے اس میں تبدیلی ہم ہرگز برداشت نہیں کرسکتے ۔

ان کے علاوہ بسوا پر بھو سوامی ایشور کھنڈرے رکن اسمبلی بھالکی، کنیز فاطمہ رکن اسمبلی کلبرگی ، بنڈپا قاسم پور رکن اسمبلی بیدرشمالی، رحیم خان رکن اسمبلی بیدر جنوب، بی نارائن راؤ رکن اسمبلی بسواکلیان ، راج شیکھر پاٹل رکن اسمبلی ہمنا آباد، رمضان درگاہ اور دیگر مذہبی رہنماؤں نے اس موقع پر مرکزی حکومت کی غلط پالیسیوں کی کڑی مذمت کرتے ہوئے نوٹ بندی سے لے کر سی اے اے ، این پی آر، این آر سی جیسے کاموں پر بغیر سوچے سمجھے عمل کرنے اور عوام کو پریشان سے مرکز کی بی جے پی حکومت کو باز آنے کا مشورہ دیا۔

مسلم خواتین نے اپنے گھروں کو قفل لگا کر اس جلسہ میں شرکت کی جبکہ دلت طبقہ سے تعلق رکھنے والے افراد کی کثیر تعداد موجود تھی۔ بسواکلیان و اطراف و اکناف سے کثیر تعداد میں عوام نے اس جلسہ میں شرکت کرتے ہوئے مرکزی حکومت کے خلاف اپنی ناراضگی اظہار کیا۔

اس موقع پر اجئے سنگھ ایم ایل سی بیدر ، میر اظہر علی نورنگ سابق صدر بلدیہ بسواکلیان ، میر تحسین علی جمعدار، مجاہد پاشاہ قریشی ریاستی سکریٹری ویلفیئر پارٹی آف انڈیا کرناٹک ، یشودنیلکنٹ راتھوڑ صدر تعلقہ پنچایت ، شری پنج کشری جی بیلور مٹھ سوامی ، سوامی جی دلت طبقہ ، امیت دیشمکھ رکن اسمبلی لاتور، ابھئے سولانکی، اکرام الدین کھادی والے ، قطب الدین ، محمد رئیس احمد ، غفار پیش امام ، حافظ اکبر کے علاوہ کئی معززین موجود تھے۔