بنگلورو، 7؍اگست(ایس او نیوز)کوئی بھی چاہے کچھ بھی کہے،آئندہ انتخابات میں عوام جے ڈی ایس کے حق میں ووٹ ضرور دیں گے اور ریاست میں آئندہ دنوں جے ڈی ایس حکومت ضرور اقتدار پر آئے گی۔ یہ با ت سابق وزیراعلیٰ ایچ ڈی کمار سوامی نے کہی۔

انہوں نے یہاں کوڈلور دیہات میں منعقدہ وزیر اعلیٰ گرامینا سائٹ منصوبے میں بے گھر افراد میں دوسرے مرحلے کے حق پتر تقسیم کرنے کے بعد اپنے خطاب میں کہاکہ آئندہ سال جے ڈی ایس حکومت اقتدار پرآتے ہی پنچ رتنامنصوبہ جاری کیاجائے گا،جنتا جل دھارے منصوبے کے تحت ریاست کا پانی ریاست کے عوام کو استعما ل کیلئے فراہم کیاجائے گا۔ سمندر کو بہنے نہیں دیاجائیگا۔تمام قریوں کو پینے کا شفاف پانی فراہم کرنے ضروری اقدامات کئے جائیں گے۔ہر گرام پنچایت کی حدود میں اسکول،اسپتال قائم کئے جائیں گے اوربچوں کو معیاری تعلیم کے ساتھ دیہی علاقوں کے عوام کو بہتر طبی سہولت فراہم کی جائے گی۔ہر گرام پنچایت کی حدود میں ایک ہی چھت کے نیچے پہلی تا بارہویں جماعت تک کی تعلیم دینے کا انتظام کیاجائے گا۔ہر گرام پنچا یت کی حدود میں 30بستروں پر مشتمل اسپتال کا قیام عمل میں لایاجائے گا۔خواتین کو خود کفیل بنانے اور ان کے پیروں پر انہیں کھڑاکرنے کے مقصد سے اور نوجوانوں کو روزگار کے مواقع فراہم کرنے کیلئے مختلف منصوبے بنائے جائیں گے۔جسمانی معذوروں کو ماہانہ دی جارہی پنشن کی رقم کو بڑھاکر 2500کرنے کا منصوبہ بھی زیرغو رہے۔ریاست میں جے ڈی ایس حکومت کے دوران کبھی فنڈ کی قلت پیش نہیں آئے گی،عوام کا پیسہ عوام کیلئے ہی خرچ کیاجائے گا۔کوڈلور دیہات کے بے گھر افراد کو فراہم کی جانے والی سائٹس کی ترقی کیلئے حکومت کی طرف سے ہی اقداما ت کئے جائیں گے۔جے ڈی ایس حکومت کوڈگو کی طرز پر کوڈلور میں گھر تعمیر کرے گی اور مرحلہ وار پوری ریاست میں اس منصوبے کو جاری کردیاجائے گا۔

اس موقع پر تعلقہ مجسٹریٹ سدرشن،تعلقہ پنچایت سی ای او شیوکمار،کوڈلور گرا م پنچایت کے صدر گووند گوڈا،نائب صدر بھاگیما،جے ڈی ایس تعلقہ صد ر ایچ سی جئے متو،ریاستی یوا جنتادل ایس کے جنرل سکریٹری سید عظیم،ڈی سی سی بینک کے ڈائرکٹر جئے رامو،پی ایل ڈی بینک کے سابق صدر سدارامواور دیگر موجود تھے۔