انڈیا بلاک اقتدار میں آنے پر قانون میں لائی جائے گی تبدیلی ؛ چدمبرم نے کہا ؛ زیر سماعت قیدی جب مجرم نہیں ہوتے تو اُنہیں جیل میں رکھا جانا غلط
نئی دہلی 22/اپریل (ایس او نیوز) سابق مرکزی وزیر اور کانگریس لیڈر پی چدمبرم نے کہا ہے کہ اگر انڈیا بلاک مرکز میں برسراقتدار آتا ہے، تو وہ سپریم کورٹ کے قائم کردہ "ضمانت ایک اصول ہے، اور جیل ۔ استثناء ہے" کو لاگو کرنے کا قانون لائیں گے۔ چدمبرم نے کہا کہ ضمانت دینے کے اُصول پر نچلی اور ضلعی عدالتوں میں شاذ و ناد ہی عمل ہوتا ہے ۔ ظاہر بات ہے کہ ہر کوئی ضمانت حاصل کرنے کے لئے سپریم کورٹ تک جانے کی استطاعت نہیں رکھتا ۔ اس کا نتیجہ یہ ہوتا ہے کہ 65% قیدی 'زیر سماعت' قیدی ہوتے ہیں ۔ وہ سزا یافتہ مجرم نہیں ہوتے ۔ پھر انہیں کیوں جیل میں رکھا جاتا ہے ؟" انہوں نے کہا کہ " 90% سے زیادہ زیر سماعت قیدی دیگر پسماندہ طبقات (او بی سی)، ایس سی اور ایس ٹی طبقے سے تعلق رکھتے ہیں ۔ اس لئے ہم "بیل اِز رول، جیل اِز ایکسیپشن" والا نیا قانون وضع کریں گے جس کے تحت ہر ملزم کو پولیس یا سی بی آئی کی 15 دن کی تفتیش کے بعد ضمانت ملنی چاہیے ۔"
ایک پریس کانفرنس سے خطاب کرتے ہوئے چدمبرم نے مزید کہا کہ پارلیمانی الیکشن کے بعد انڈیا بلاک کی حکومت بنتی ہے تو سی اے اے سمیت مختلف نئے قوانین اور ترمیمات کو منسوخ کیا جائے گا ۔ کانگریس مینی فیسٹو کمیٹی کے چیرمین چدمبرم نے واضح کیا کہ "اگر مرکز میں انڈیا بلاک اقتدار پر آتا ہے تو سب سے پہلے بی جے پی حکومت کی طرف سے لائے گئے شہریت ترمیمی قانون (سی اے اے) کی تنسیخ، ترمیم اور نظر ثانی کا کام کریں گے ۔ اس کے علاوہ کسانوں سے متعلقہ فارمرس پروڈیوس، ٹریڈ اینڈ کامرس پروموشن آف فیسی لیٹیشن ایکٹ 2020، آئی پی سی کی جگہ لایا گیا بھارتیہ نیائے (سیکنڈ) سنہیتا ، سی آر پی کی جگہ لایا گیا ناگرک سرکھشا سنہیتا اور ایوڈینس ایکٹ کی جگہ لایا گیا بھارتیہ ساکشیا (سیکنڈ) سینہیتا جیسے فوجداری قوانین کی بھی تنسیخ یا ترمیم کردیں گے ۔ اس کے علاوہ دیگر آٹھ قوانین ایسے ہیں جنہیں ہم منسوخ کریں گے اور ان کی جگہ نئے قوانین لائیں گے ۔ 25 ایسے قوانین ہیں جن میں ترمیم کی جائے گی اور انہیں دستوری تقاضوں کے مطابق ڈھالا جائے گا ۔ لہِذا ایک بات صاف ہے کہ ہم سی اے اے کو پوری طرح منسوخ کر دیں گے ۔ "
کمیونسٹ پارٹی آف انڈیا نے کانگریس پر الزام لگایا تھا کہ کانگریسی لیڈران سی اے اے کے تعلق سے زبان نہیں کھولتے ، اسے مسترد کرتے ہوئے چدمبرم نے کہا کہ "ششی تھرور نے سی اے اے کے خلاف بڑے واضح طور پر تبصرہ کیا ہے اور اس کی بڑے پیمانے پر رپورٹنگ بھی ہوئی ہے ۔ راہل گاندھی اور پریانکا گاندھی بھی کھلے عام سی اے اے کے خلاف بولتے رہے ہیں ۔"
خیال رہے کہ یو پی اے حکومت کے دوران پی چدمبرم کے پاس 2008 سے 2012 تک وزارت داخلہ کا قلمدان تھا ۔