نئی دہلی،05 /ستمبر(ایس او نیوز/ آئی این ایس انڈیا) ایئر سیل-میکسس معاملے میں دہلی کی عدالت نے سی بی آئی اور ای ڈی کی طرف سے ریکارڈ معاملوں میں سابق مرکزی وزیر پی چدمبرم اور ان کے بیٹے کارتی کو پیشگی ضمانت دے دی ہے۔ساتھ ہی عدالت نے پی چدمبرم، ان کے بیٹے کارتی کو سی بی آئی، ای ڈی کی طرف سے ریکارڈ ایئر سیل-میکسس معاملات میں تحقیقات میں شامل ہونے کی ہدایت دی۔وہیں پیشگی ضمانت ملنے کے بعد کارتی چدمبرم نے ٹویٹ کر کے کہاکہ ہم کچھ اور بھی جیتیں گے۔ اس سے پہلے سی بی آئی اور ای ڈی نے پی چدمبرم اور ان کے بیٹے کارتی کی پیشگی ضمانت کی درخواستوں پر دوپہر دو بجے سنائے جانے والے احکامات کو ٹالنے کی درخواست کی جسے عدالت نے مسترد کر دیا۔سی بی آئی کی جانب پیش ہوئے اضافی سالیسٹر جنرل کے ایم نٹراج نے خصوصی جج او پی سینی سے سپریم کورٹ کے جمعرات کو سنائے گئے حکم پر غور کرنے کی درخواست کی۔سپریم کورٹ نے بدھ کوای ڈی کی طرف سے ریکارڈ آئی این ایکس میڈیا منی لانڈرنگ معاملے میں چدمبرم کو گرفتاری سے قبل ضمانت دینے سے انکار کر دیا۔ لیکن عدالت نے سی بی آئی اور ای ڈی کی درخواست کو مسترد کر دیا اور کہا کہ حکم دوپہر دو بجے سنایا جائے گا۔چدمبرم 305 کروڑ روپے کے آئی این ایکس میڈیا معاملے کے ساتھ ایئر سیل-میکسس معاملے میں جانچ ایجنسیوں کے گھیرے میں ہیں۔