چدمبرم کو تہاڑجیل بھیج دیا گیا عدالتی حراست کی مخالفت میں کپل سبل کی زوردار بحث بے نتیجہ
نئی دہلی،6؍ستمبر(ایس او نیوز؍ایجنسی) آئی این ایکس میڈیا معاملے میں کانگریس کے سینئر لیڈر اور سابق مرکزی وزیر پی چدمبرم کو سی بی آئی عدالت نے 19 ستمبر تک کیلئے تہاڑ جیل بھیج دیا گیا -انہوں نے ضمانت کیلئے عرضی دی تھی جو نامنظور ہوگئی- چدمبرم کی جیل میں الگ سیل، پلنگ اور الگ باتھ روم کی مانگیں منظورکرلی گئی ہیں - ذرائع کے مطابق چدمبرم کو تہاڑ جیل نمبر7 میں رکھا جائے گا-آئی این ایکس میڈیا بدعنوانی اور منی لاؤنڈرنگ معاملے میں چدمبرم 22اگست سے سی بی آئی حراست میں تھے -خصوصی جسٹس اجے کمار کوہار نے سابق مرکزی وزیر کے وکیل کپل سبل کی اس دلیل کو قبول کرنے سے انکار کردیا جس میں چدمبرم کو عدالتی حراست میں نہ بھیجنے کی درخواست کی گئی تھی-سابق مرکزی وزیر اس معاملے میں اب 14دن جیل میں رہیں گے -انہیں 21اگست کی رات کو سی بی آئی نے ان کے گھر سے گرفتار کیا تھا-چدمبرم کو آج سی بی آئی کی حراست ختم ہونے پر راؤز ایونیو میں واقع خصوصی جج کی عدالت میں پیش کیا گیا تھا- مسٹر سبل نے عدالت سے درخواست کی کہ ان کے مؤکل انفورسمنٹ ڈائرکٹوریٹ کے سامنے خود سپردگی کے لئے تیار ہیں اور انہیں عدالتی حراست میں نہیں بھیجا جانا چاہئے -انہوں نے چدمبرم کی عدالتی حراست کی مخالفت کرتے ہوئے کہا کہ ان کے مؤکل پر جانچ کو متاثر کرنے اور اس میں کسی قسم کی رکاوٹ ڈالنے کا کوئی الزام نہیں ہے - انہوں نے کہا کہ ان کے مؤکل آئی این ایکس میڈیا منی لانڈرنگ معاملے میں ای ڈی کی حراست میں جانے کے لئے تیار ہیں -اس سے پہلے سابق وزیر کو سپریم کورٹ سے جھٹکا لگا تھا- اعلیٰ عدالت نے آج ہی ان کی انفورسمنٹ ڈائرکٹوریٹ کی گرفتاری سے بچنے کے لئے عبوری ضمانت عرضی کو خارج کردیا تھا-چدمبرم پر یہ معاملہ انورسمنٹ ڈائرکٹوریٹ نے درج کیا ہے - دہلی ہائی کورٹ نے20 اگست کو ان کی اپیل خارج کردی تھی اور اس کے بعد انہوں نے سپریم کورٹ میں اس فیصلے کو چیلنج کیا تھا-اعلیٰ عدالت میں جسٹس آر بھانومتی اور جسٹس اے ایس بوپنا کی بنچ نے چدمبرم کی عبوری ضمانت خارج کرتے ہوئے کہا کہ عبوری ضمانت دینے کے لئے یہ مناسب وقت نہیں ہے - اس وقت عبوری ضمانت دینے سے جانچ متاثر ہوسکتی ہے -عدالت نے29اگست کو اس معاملے پر سماعت پوری کرنے کے بعد فیصلہ محفوظ کرلیا تھا- بنچ نے کہا کہ جانچ ایجنسی کو معاملے کی تفتیش کرنے کے لئے مناسب آزادی دی جانی چاہئے -بنچ نے حکم میں کہا ہے کہ عبوری ضمانت کو کسی کو اس کے حق کے طور پر دیا جاسکتا ہے لیکن یہ معاملے پر منحصر کرتا ہے -عدالت نے عبوری ضمانت عرضی خارج کرتے ہوئے کہا کہ انفورسمنٹ ڈائرکٹوریٹ کی کیس ڈائری کو ہم نے دیکھا ہے اور ہم جانچ ایجنسی کے اس دعویٰ سے متفق ہیں کہ معاملے میں ملزم کو گرفتار کرکے حراست میں پوچھ گچھ کرنا ضروری ہے - ڈائرکٹوریٹ کی اس بات سے ہم متفق ہیں کہ منی لانڈرنگ کو بے نقاب کرنا ضروری ہے -سی بی آئی کی جانب سے تشار مہتا نے کہا کہ سپریم کورٹ نے بھی کہا ہے کہ یہ بڑا معاملہ ہے -سپریم کورٹ نے بھی ہماری دلیل مانی ہے کہ چدمبرم ثبوتوں کے ساتھ چھیڑ چھاڑ کر سکتے ہیں - ہم نے کئی ممالک میں لیٹر روگیٹری بھیجے ہیں - برطانیہ، امریکہ سمیت پانچ ممالک میں ہم نے لیٹر روگیٹری بھیجے ہیں - غیر ملکی اکاؤنٹس میں جمع پیسوں میں چھیڑ چھاڑ کی جا سکتی ہے- اقتصادی جرائم ایک الگ زمرہ کا جرم ہے، یہ بات سپریم کورٹ نے بھی کہی ہے-واضح ہو کہ یہ کیس آئی این ایکس میڈیا گھوٹالے سے منسلک منی لانڈرنگ کیس ہے- کیس میں سی بی آئی کی حراست کی دو دن کی مدت ختم ہونے کے بعد چدمبرم کو دہلی کی ایک عدالت میں پیش کیا گیا تھا- واضح ہو کہ سابق مرکزی وزیر پی چدمبرم پر الزام ہے کہ وزیر خزانہ رہتے غیر ملکی سرمایہ کاری کو منظوری دی گئی- سی بی آئی نے اس معاملے میں ان کے بیٹے کارتی کو گرفتار کیا تھا اور فی الحال ضمانت پر ہیں - کارتی پر2007میں آئی این ایکس میڈیا کو غیر ملکی سرمایہ کاری کے فروغ بورڈکی منظوری دلانے کے لئے پیسے لینے کا الزام ہے- اس وقت ان کے والد یو پی اے حکومت میں وزیر خزانہ تھے-