نگلورو،26/اپریل(ایس او نیوز) بی جے پی کی مرکزی قیادت نے ملک بھر میں جاری لوک سبھا انتخابات کی تکمیل تک ریاست میں آپریشن کمل پر روک لگادی ہے،اور ریاستی قائدین کو اس خصوص میں واضح احکامات جاری کردئے گئے ہیں۔ باخبر ذرائع کے مطابق اگر لوک سبھا انتخابات سے پہلے ہی آپریشن کمل کیا جائے تو ملک بھر میں یہ تاثر پیدا ہوگا کہ بی جے پی کو اقتدار کی ہوس ہوگئی ہے۔ بی جے پی قیادت کے احکامات کے بعد ریاستی بی جے پی کی کور کمیٹی کے اجلاس میں فیصلہ لیاگیا کہ 23مئی تک بی جے پی لیڈر کانگریس اور جے ڈی ایس اراکین اسمبلی سے دور رہیں گے۔ اسی طرح کانگریس کے باغی رکن اسمبلی رمیش جارکی ہولی سے بھی کسی بھی طرح کی کوئی بات چیت نہیں کی جائے گی۔ بی جے پی قیادت کو بھروسہ ہے کہ 23 مئی کو ہونے والے نتائج میں انہیں اقتدار ملے گا۔ اور اپنے بل پر مرکز میں حکومت تشکیل دی جاسکتی ہے۔ اسی لئے تب تک خاموشی اختیار کرنے کو کہا گیا ہے۔ قابل ذکر بات یہ ہے کہ ریاست میں اب تک چار مرتبہ آپریشن کمل کی کوششیں ناکام ہوگئی ہیں۔ جس سے پارٹی کا وقار مجروح ہوگیا ہے۔ ایسے میں دوبارہ پارٹی کی ساکھ متاثر نہ ہونے پائے اسی لئے منظم طریقے سے 23مئی کے بعد حکمت عملی تیار کرنے کا فیصلہ لیا گیا ہے۔ بی جے پی کا کہنا ہے کہ مرکز میں اقتدار پر بحالی کے بعد کانگریس اور جے ڈی ایس کے 20 سے زائد اراکین اسمبلی مستعفی ہونے کے بعد پارٹی میں شمولیت اختیار کرلیں گے۔