اڑیشہ میں کورونا وائرس کے 577 نئے مریض، مجموعی تعداد 11 ہزار سے متجاوز
بھونیشور،09 /جولائی (آئی این ایس انڈیا) اڑیشہ میں جمعرات کو ایک ہی دن میں کورونا 577 نئے معاملے رپورٹ ہوئے جس کے بعد ریاست میں متاثرہ افراد کی مجموعی تعداد 11201 ہوگئی ہے۔ محکمہ صحت کے ایک عہدیدار نے یہ اطلاع دی۔
عہدیدار نے بتایا کہ کورونا وائرس کے انفیکشن کی وجہ سے مزید چار افراد کی ہلاکت کے بعد ریاست میں مرنے والوں کی مجموعی تعداد 52 ہوگئی ہے۔
محکمہ صحت نے ایک بیان میں کہاکہ اسپتالوں میں علاج کے دوران 4 کورونا کے مریضوں کی ہلاکت کی المناک خبر ہے۔ وہیں ملک میں کورونا کا قہر جاری ہے۔
ہندوستان میں کورونا وائرس کے مریضوں کی تعداد میں تیزی سے اضافہ ہورہا ہے۔ آج پہلی بار 24 گھنٹوں میں کورونا کے تقریبا 25 ہزار نئے کیس سامنے آئے ہیں۔ ملک میں متاثرہ افراد کی تعداد آٹھ لاکھ کے قریب پہنچ چکی ہے۔
وزارت صحت کے اعداد و شمار کے مطابق کورونا میں اب تک 7 لاکھ 67 ہزار 297 افراد متاثر ہوئے ہیں۔ ان میں سے 21129 افراد لقمہ اجل بن چکے ہیں، جبکہ چار لاکھ 76 ہزار افراد بھی ٹھیک ہوچکے ہیں۔
گذشتہ 24 گھنٹوں کے دوران کورونا وائرس کے 24 ہزار 879 نئے کیس رپورٹ ہوئے اور 487 اموات ہوئیں۔