بنگلورو،13/جنوری (ایس او نیوز؍راست) 11/جنوری بروزِہفتہ بمقام القدس ہال بنگلور میں ویژن کرناٹکاکی ایک خصوصی نشست، ایوب احمدخاں کنوینرادارہئ ہٰذا کی صدارت میں منعقد ہوئی، جس میں ویژن کرناٹک کے تمام ارکان کے ساتھ کچھ نئے ساتھی اور چند کالج کے طلبا بھی شریک رہے۔ ویژن کرناٹکا کے نائب کنوینر مختاراحمد کی قرأت کے ساتھ گفتگو کا آغاز ہوا۔ جس میں پچھلی کارگزاریوں پر اور آئندہ کے منصوبوں پر تفصیلی گفتگو ہوئی اور تمام ارکان کی متفقہ رائے سے چنداہم فیصلے لئے گئے۔ 28/دسمبر2019/کو ویژن کرناٹکا کی جانب سے شہر بنگلور کے امبیڈکربھون میں ین.آر.سی اور سی.اے.اے جیسے کالے قانون کے تعلق سے عوام میں شعور پیداکرنے کی خاطر اجلاس منعقد ہوا۔ ریاست کے دیگر اضلاع کے مقامی رہنماؤں کی جانب سے ویژن کرناٹکا کو پیغامات موصول ہورہے ہیں کہ ایسے اجلاس دیگر شہروں میں منعقد کئے جائیں۔ اس موضوع پر تفصیلی گفتگو کے بعد ارکان کی متفقہ رائے سے یہ فیصلہ کیا گیا کہ اس طرح کے اجلاس کا انعقاد ضروری بھی ہیں اور لوگوں کی پسندبھی ہے اس لئے اس پر عمل کیا جائے گا۔ اسی مقصد کے لئے پہلے تین اضلاع، میسور، ٹمکور اور بیدر کو منتخب کیا گیا اور ان اضلاع میں اجلاس کے انعقاد کے انتظامات کی ذمہ داری چند منتخب ارکان کو سونپی گئی۔دوسرا یہ فیصلہ لیا گیا کہ ویژن کرناٹکا کی جانب سے ایک وفد ریاست کے وزیراعلیٰ سے ملاقات کرکے قوم و ملت کے سلگتے ہوئے مسائل کے تعلق سے ایک میمورینڈم پیش کرے اور اس مقصد کے لئے وزیراعلیٰ سے وقت اور تاریخ لینے کی کوشش کی جائے گی اور یہ کام جلد سے جلد کیا جائے گا۔مرکز کے غیرآئینی اور غیرانسانی قوانین کے خلاف آج سارے ملک میں احتجاجات کی لہر دوڑگئی ہے، ویژن کرناٹکا ان تمام لوگوں اور اداروں کی حمایت کرتاہے جو اس کالے قانون کے خلاف اٹھ کھڑے ہوئے ہیں، اور جو بھی ادارے اس تعلق سے کام کررہے ہیں ہم ان کا تعاون کرنے کے لئے بھی تیار ہیں اور یہ ادارہ ان تمام لوگوں سے اور اداروں سے اپیل کرتا ہے کہ حکومت کے اس کالے قانون کے خلاف آواز بلند کرنے کے لئے اگر ویژن کرناٹکا کے تعاون کی ضرورت پڑے تو ہمارے ساتھ روابط قائم کریں۔آخر میں اس اجلاس میں شرکت کرکے اپنا وقت دینے والوں کا شکریہ ادا کرتے ہوئے مولاناخلیل الرحمن مدنی عمری کی دعاء کے ساتھ نشست کا اختتام ہوا۔