این آرسی صرف غیر ملکیوں کے لئے، مسلمانوں کو خوفزدہ ہونے کی ضرورت نہیں: مختار عباس نقوی

Source: S.O. News Service | Published on 12th October 2019, 12:07 PM | ملکی خبریں |

ممبئی،12؍اکتوبر (ایس او نیوز؍یو این آئی)  مرکزی وزیر برائے اقلیتی امور وحج مختار عباس نقوی نے آج یہاں کہا کہ اقلیتوں اور خصوصاً مسلمانوں کو این آرسی جیسے قانون سے خوفزدہ ہونے کی کوئی ضرورت نہیں کیونکہ این آرسی قانون صرف غیرملکیوں کے خلاف ہے۔ جبکہ مسلمان اس ملک میں صدیوں سے آباد ہیں اور ان کے آباؤ اجداد بھی یہیں سے تعلق رکھتے ہیں۔

جنوبی ممبئی کے مسلم اکثریتی علاقے بھنڈی بازارمیں کھتری جماعت خانہ ہال میں بی جے پی امیدواروں کی انتخابی مہم کا آغاز کرتے ہوئے مختار عباس نقوی نے کہا کہ مسلمانوں کے آبا ؤاجداد یہیں سے تعلق رکھتے ہیں اور مسلمانوں کو یہاں سے کوئی نکال نہیں سکتا ہے۔ یہ قانون ان لوگوں کے خلاف ہے، جن کے پاس ہندوستان کی شہریت کا کوئی ثبوت نہیں ہے اور نہ ہی ان کا اس ملک سے کوئی تعلق رہا ہے۔ اس جلسہ سے بی جے پی ترجمان اتل شاہ اور مقامی لیڈر شکیل قاضی اور دیگر نے بھی خطاب کیا۔

انہوں نے کسی سیاسی پارٹی کا نام لئے بغیر کہا کہ چند سیاسی پارٹیاں اس معاملہ میں اقلیتی فرقے کو گمراہ کر رہی ہیں اور نقوی نے وزیراعظم نریندرمودی کے ’سب کا ساتھ سب کا وکاس‘ جیسے نعرہ کا حوالہ دیا جس کے تحت سبھی ترقی کی راہ پر گامزن ہیں۔

ایک نظر اس پر بھی