کرناٹک میں بی جے پی کے آپریشن کمل سے جمہوری قدروں اور آئینی تقاضوں کی پامالی ہورہی ہے: ایس ڈی پی آئی
بنگلور و،24/جولائی (ایس او نیوز/پریس ریلیز) سوشیل ڈیموکریٹک پارٹی آف انڈیا (SDPI) کرناٹک شاخہ کی جانب سے ریاست کرناٹک میں جاری سیاسی بحران اور آپریشن کمل کے ذریعے اراکین اسمبلی کی خرید و فروخت کی سخت مذمت کرتے ہوئے شہر بنگلور میں تنی سندرا وارڈ اور شیواجی نگر میں ایس ڈی پی آئی بنگلور ضلع کی جانب سے احتجاجی مظاہروں کا انعقاد کیا گیا۔ بنگلور ضلعی سکریٹری مزمل پاشاہ نے اپنے خطاب میں کہا کہ کرناٹک میں حکمران کانگریس اور جنتادل (سیکولر) کے 14اراکین کے اسمبلی رکنیت سے استعفی دینے اور حکومت کو گرانے اور نئی حکومت قائم کرنے کیلئے بی جے پی کے طرف سے جو ہارس ٹریڈنگ اور ریسارٹ پالیٹکس جاری ہے اس سے ہمارے جمہوری قدروں اور آئینی تقاضوں کی پامالی ہورہی ہے۔مزمل پاشاہ نے مزید کہا کہ 2018میں اسمبلی انتخابات کے دوران چند ریٹائرڈ بیوروکریٹس نے خوف کی سیاست کرتے ہوئے ووٹروں کو ڈراکر اور مذہبی اداروں کا استعمال کرکے کانگریس کو غیر مشروط ووٹ دلانے کیلئے ایڑی چوٹی کا زور لگائے تھے۔ کانگریس کے حق میں ووٹ حاصل کرنے والے یہ بیوروکریٹس انتخابات کے بعد ملک میں اقلیتوں پر ہورہے مظالم اور ماب لنچنگ پر خاموش بیٹھے ہوئے ہیں، جس سے ان کی مفاد پرستی کا ثبوت ملتا ہے۔ بی جے پی اپنے آپریشن کمل کے ذریعے دن دہاڑے جمہوریت کا قتل کررہی ہے اورشرمناک طور پر اراکین اسمبلی کی خرید وفروخت کررہی ہے۔ ایس ڈی پی آئی اس کی سخت مذمت کرتی ہے اور کرناٹک میں جاری سیاسی بحران کو بی جے پی،کانگریس اور جے ڈی ایس کوذمہ دار مانتی ہے۔ ایس ڈی پی آئی کا مطالبہ ہے کہ کرناٹک میں جاری سیاسی بحران کے خاتمہ کیلئے ریاستی اسمبلی کیلئے عبوری انتخابات کرائے جائیں۔اس احتجاجی مظاہرے میں ایس ڈی پی آئی ریاستی ورکنگ کمیٹی رکن سمیع حضرت، تنی سندر ا وارڈ صدر شکیل باشاہ، ناگوارا وارڈ صدر عباس، بنگلور ضلعی جنرل سکریٹری سلیم احمد، ضلعی نائب صدر گنگپا، شیواجی نگر وارڈ انچارج مشتاق سمیت سینکڑوں کارکنان شریک رہے۔