بنگلورو،23؍جون (ایس او نیوز؍ایجنسی)  سابق چیف منسٹر کرناٹک ایچ ڈی کمارسوامی نے الزام عائد کیاہے کہ اگنی پتھ اسکیم راشٹریہ سوئم سیوک سنگھ (آرایس ایس)کا خفیہ ایجنڈہ ہے تاکہ وہ ہندوستانی فوج پرکنٹرول کرسکے۔

انہوں نے کہاکہ اگنی ویر، فوج میں اوراس کے باہرآرایس ایس کے کارکن بن جائیں گے اوراپنی خدمات ختم ہونے کے بعدبھی کارکن بنے رہیں گے۔

سابق چیف منسٹر کماراسوامی نے انتہائی متنازعہ بیان دیتے ہوئے کہاکہ کیاآرایس ایس ان کی بھرتی کرے گی یا فوج؟ اب 10لاکھ افراد کی بھرتی کی جائے گی۔ ہوسکتاہے کہ وہ لوگ آرایس ایس کاریہ کرتاؤں کوفوج میں ڈھکیل دیں۔

وہ لوگ فوج میں ڈھائی لاکھ آرایس ایس ورکرس کو شامل کرواسکتے ہیں اوران کا خفیہ ایجنڈہ یہ ہے کہ جن75 فیصد جوانوں کو11لاکھ روپے دیکر سبکدوش کیاجائے گا وہ ملک بھرمیں پھیل جائیں گے۔

کماراسوامی نے مزیدکہاکہ اندر اورباہرکے لوگ آرایس ایس کے ہوں گے۔ ان کامنصوبہ یہ ہے کہ فوج پرآرایس ایس کا غلبہ ہوجائے۔کماراسوامی نے اس اسکیم کو آرایس ایس کی اگنی پتھ قراردیتے ہوئے یاددہانی کرائی کہ آرایس ایس جرمنی میں ہٹلر کے نازی دورحکومت میں قائم کی گئی تھی۔