ممبئی 9/جون (ایس او نیوز) ممبئی سمیت مہاراشٹرا کے بیشتر علاقوں میں گھن۔گرج چمک کے ساتھ متوقع وقت سے دو روز پہلے ہی شروع ہونے والی  زبردست  بارش نے عام زندگی کو مفلوج کرکے رکھ دیا ہے۔  محکمہ موسمیات کے مطابق  مہاراشٹر میں آئندہ دو تین دنوں تک بارش کا سلسلہ جاری رہے گا  ۔

ذرائع سے ملی اطلاع کے مطابق جمعرات صبح سے ممبئی کے شہری اور نواحی علاقوں میں موسلادھار بارش کا سلسلہ جاری ہے اور صبح 9اور 10 بجے کے درمیان بجلی کوندنےکے ساتھ بادلوں کی گھن گرج کے ساتھ بارش ہونے کی اطلاع ہے، پتہ چلا ہے کہ  قریب چار گھنٹوں تک  مسلسل بارش ہوئی ہے  جس کی وجہ سے نشیبی علاقے زیرآب آگئے ہیں،ٹرین کی پٹریاں پانی میں ڈوبنے سے مقامی ٹرین سروس  بھی معطل کردی گئی ہیں  جب کہ سڑکوں پر پانی جمع ہونے سے ٹریفک کا نظام بھی متاثر ہوگیا ہے۔ جگہ جگہ پانی جمع ہوجانے سے سواریاں بھی  راستوں میں پھنس گئی ہیں  اور لوگ گٹھنوں گٹھنوں پانی میں پیدل سفر کرنےپر مجبور ہوگئے ہیں۔ محکمہ موسمیات نے اگلے دو دنوں میں ریاست تلنگانہ،آندھراپردیش،اڑیسہ اور مغربی بنگال میں بھی بارشیں ہونے کا امکان ظاہر کیا ہے۔