بنگلورو،19؍اکتوبر(ایس او نیوز)اس مرتبہ66کنڑا راجیہ اتسوا ایوارڈ س کیلئے محکمہ کنڑا اینڈ کلچر سے عرضیاں طلب کی گئی تھیں۔ محکمہ کو اب تک 6ہزار عرضیاں موصول ہوئی ہیں۔ ہر سال یکم نومبر کو کنڑا راجیہ اتسوا کے موقع پر مختلف شعبوں میں نمایاں خدمات انجام دینے والے افراد کو اس ایوارڈ سے نوازا جاتا ہے۔ اب تک 6ہزار عرضیاں محکمہ کو موصول ہوئی ہیں۔ لیکن اس ایوارڈ کیلئے آخری منٹ تک لابی چلائی جاتی ہے۔ آخری دنوں میں بھی منتخب احباب کی فہرست میں ناموں کو شامل کیا جاتا ہے۔ اس ایوارڈ کے لئے ایسا کوئی سال نہیں جب ضابطوں پر عمل کے ساتھ ایوارڈ س دیئے گئے ہوں، آخری لمحات تک فہرست میں ناموں کو شامل کیا جاتا ہے، گویا ایسالگتا ہے کہ خدمات کی نشاندہی کرکے ایواراڈ دینے کی بجائے چند لوگ سفارش سے اور لڑ جھگڑ کر اس ایوارڈ کو حاصل کرتے ہیں۔ اس تقریب میں بھی اکثر دیکھا گیا ہے کہ خدمات کے صلہ میں منتخب ہونے والے ایوارڈ یافتگان کسی کونے میں خاموشی سے بیٹھ کر اپنی باری کاانتظار کرتے ہیں۔ جبکہ زبردست لڑ جھگڑ کر ایوارڈ حاصل کرنے والوں کا زیادہ شوشرابہ رہتا ہے اور خود کی تشہیر کیلئے اسٹیج کے سامنے سامنے رہتے ہیں۔ اس مرتبہ عوام کو یہ اختیار دیا گیا تھا کہ وہ مختلف شعبوں میں نمایاں خدمات انجام دینے والوں کی نشاندہی کرکے ان کی سفارش کریں، شاید اس لئے صرف66ایوارڈس کے لئے 6ہزار سے زیادہ عرضیاں موصول ہوئی ہیں۔ پچھلے سالوں کے مقابلہ اس مرتبہ سب سے زیادہ عرضیاں موصول ہوئی ہیں۔ محکمہ نے تمام عرضیوں کو موصول تو کرلیا ہے۔ ان عرضیوں کی جانچ پڑتال کے بعد 24/اکتوبر تک ایوارڈ یافتگان کی حتمی فہرست تیار کی جائے گی۔اس ایوارڈ کے لئے ہر سال عرضیاں زیادہ ہورہی ہیں، سال برائے2018-19میں 1300عرضیاں موصول ہوئی تھیں۔2019-20 میں 1,191عرضیاں موصول ہوئی تھیں۔2020-2021میں 3000عرضیاں موصول ہوئی تھیں۔ رواں سال میں 6000عرضیاں موصول ہوئی ہیں۔ ہر سال ان عرضیوں کی جانچ پڑتال کے بعد حتمی فہرست تیار تو کی جاتی ہے۔ لیکن آخری لمحات تک کم از کم ایک درجن نام تو شامل کئے جاتے ہیں۔ اس ایوارڈ کے لئے اس مرتبہ یہ شرط بھی رکھی گئی ہے کہ جن کی عمر60برس یا اس سے زیادہ ہے وہی ایوارڈ کے اہل ہیں۔ عرضیاں داخل کرنے کی آخری تاریخ 15/ اکتوبر رکھی گئی تھی۔ اس مرتبہ یکم نومبر کو 66 ویں کنڑا راجیہ اتسوا منایاجارہا ہے اور ایوارڈ سے بھی صرف66دیئے جارہے ہیں۔