کارپوریٹ ٹیکس کم کرنا، تاریخی قدم: مودی
نئی دہلی،20؍ستمبر(ایس او نیوز؍یو این آئی) وزیرا عظم نریندرمودی نےوزیر خزانہ نرملاسیتارمن کے کارپوریٹ ٹیکس کوکم کرنے کے فیصلے کا خیرمقدم کرتے ہوئے اسے تایخی قدم قرار دیاہے۔
وزیر خزانہ نرملا سیتا رمن نے کمپنی ٹیکس کم کرنے کے اعلان کے بعد مودی نے ٹویٹ کیا، ’کمپنی ٹیکس کم کرنے کاقدم تاریخی ہے۔ اس سے میک ان انڈیا کو زبردست فروغ حاصل ہوگا۔ پوری دنیا سے پرائیویٹ سرمایہ کاری آئے گی۔ ہمارے پرائیویٹ سیکٹر میں مقابلہ آرائی بڑھے گی۔ روزگار کے مواقع بڑھیں گے اور اس کا نتیجہ130 کروڑ ہندوستانیوں کے لیے’وِن۔وِن‘(فتح) ہوگا‘۔
وزیر اعظم نے کہا کہ گذشتہ کچھ ہفتے میں کیے گئے اعلانات سے واضح پتہ چلتا ہے کہ ہماری حکومت ملک کو تجارت کے لیے بہتر جگہ بنانے، سماج کے تمام طبقوں کے لیے مواقع بڑھانے اورترقی کرتے ہوئے معیشت کو 50 کھرب ڈالر تک لے جانے کے لیے کوئی کسر نہیں چھوڑ رہی ہے۔
قابل ذکر ہے کہ سیتارمن نے گوا میں اشیاء اور خدمات ٹیکس(جی ایس ٹی) کونسل کے اجلاس سے قبل معیشت کو رفتار دینے کی کوششوں کے تحت آج کئی بڑے اعلانات کیے۔ گھریلو کمپنیوں اور نئی گھریلو کمپنیوں کے لیے کمپنی ٹیکس کم کرنے کا اعلان کیا گیا ہے۔ گھریلو کمپنیوں کے لیے کمپنی کی شرح بغیر رعایت کے22 فیصد کی گئی ہے۔
