ایم ای ایس کی دہشت گردی کا خاتمہ ضروری: کمار سوامی
بنگلورو، 20؍دسمبر (ایس او نیوز) سابق ریاستی وزیر اعلیٰ ایچ ڈی کمار سوامی نے کہا کہ بیلگاوی میں کنڑیگاؤں کی جائیدادوں پر ایم ای ایس کے غنڈوں کی جانب سے کئے گئے حملے صرف کنڑیگا پر ہی نہیں ملک کے ساتھ غداری ہے۔ بیلگاوی میں ہوئے حملوں کے تعلق سے ٹویٹ کرتے ہوئے کمار سوامی نے اس خیال کا اظہار کیا اور کہا کہ بیلگاوی میں جاری دہشت گردی کا خاتمہ ضروری ہے۔ انہوں نے حکومت سے مطالبہ کیا کہ ان حملوں میں ملوث ایم ای ایس کے غنڈوں کو گرفتار کرکے سخت سزا دی جائے اور ریاست میں ایم ای ایس پر پابندی عائد کی جائے۔ انہو ں نے بتایا کہ بیلگاوی میں شرپسندوں نے ریاستی اسمبلی اجلاس میں شرکت کرنے پاس چسپاں کئے گئے سرکاری موٹر گاڑیوں اور پولیس کی گاڑیوں کو نشانہ بنایا ہے اور کرانتی ویرا سنگولی رائنا کے مجسمہ کی بے حرمتی ناقابل قبول ہے۔ انہو ں نے کہا کہ امن میں خلل ڈالنے اور ریاست بھر میں کنڑیگاؤں اور مراٹھیوں کے درمیان نفرت کو ہوا دینے والے شرپسندوں کے خلاف سخت کارروائی ضروری ہے۔ انہو ں نے کہا کہ کتور رانی چنما کے ساتھ مل کر برطانوی حکمرانوں کے خلاف جدوجہد کرنے والے سنگولی رائنا کی بے حرمتی ملک کی آزادی کے لئے لڑنے والے مجاہدین کی بے حرمتی ہے۔کمار سوامی نے کہا کہ ریاستی حکومت ایم ای ایس کے غنڈوں کو واضح طو رپر بتائے کہ بیلگاوی کرناٹک کا اٹوٹ حصہ ہے اور اس طرح کی تخریبی کارروائیوں سے بیلگاوی کو مہاراشٹرا میں شامل کرنے کی کوشش کامیاب نہیں ہوگی۔ انہو ں نے ریاست کی کنڑا نواز تنظیموں سے صبروتحمل سے کام لینے کی گزارش کی۔