بنگلورو،29؍دسمبر(ایس او نیوز)میکے داٹوپینے کے پانی کے منصوبے کے لیے کئے جارہے دس روزہ پدیاتراسے متعلق تیاریاں کی جارہی ہیں، اس سلسلہ میں تشہیری کمیٹی کے اجلاس میں شرکت کرتے ہوئے پدیاتراکوکامیاب کرنے کے لیے پارٹی ورکرس سے کے پی سی سی کے کارگزارصدررام لنگاریڈی نے اپیل کی ہے۔

کرناٹک پردیش کانگریس کمیٹی (کے پی سی سی)کی جانب سے میکے داٹومنصوبے کے نفاذکے سلسلہ میں مرکزی حکومت سے اصرارکرتے ہوئے 9جنوری سے 10 روزہ پدیاتراشروع کی جارہی ہے۔اس ضمن میں رام لنگاریڈی کی زیرقیادت نگران کارایس منوہرکی موجودگی میں جائزہ اجلا س کیاگیا۔ اجلاس سے خطاب کرتے ہوئے انہو ں نے کہاکہ بنگلوراورآس پاس کے اضلاع میں پینے کے پانی کی شدیدقلت کاسامناہے،وہاں عوام پانی کے ترس رہے ہیں اس لیے اس پدیاترامیں عوام بھی شامل ہورہے ہیں۔ بہت سارے اداروں اورانجمنوں کی جانب سے اس پدیاتراکی تائیدکااعلان کیاگیا ہے۔

انہوں نے کہاکہ کروڑوں لوگوں کی پانی کی پیاس بجھانے کے لیے میکے داٹوایک اہم ترین منصوبہ ہے،یہ اسکیم کانگریس حکومت نے شروع کی تھی،مرکزی حکومت اس منصوبے کی اجازت دیتی ہے تو یہ منصوبہ بروئے کارآسکتاہے۔اس منصوبے پرعمل آوری سے 50سال تا100سال کی طویل مدت سے پینے کے پانی کے مسئلہ سے جوجھ رہے بنگلوراوراطراف واکناف کے لوگوں کے مسئلہ حل ہوجائے گا۔اس منصوبے کی تکمیل کے لیے ہم سب کومتحدہ طورپر کوشش کرنی چاہئے۔دس دنوں تک پدیاترامیں شامل ہونے والوں کے لیے بروقت جانکاری فراہم کی جاتی رہے گی۔

اس اجلاس میں وی شنکر، ناگراج،کرشنا، وینکٹیش،چندشیکھر، شوبھا وینو گوپال،اے آنند، جیاسمہا،پرکاش، ودیگر قائدین شریک رہے۔