بنگلورو،16؍ جنوری (ایس او نیوز؍راست) مسجد حسنیٰ شانتی نگر بنگلور میں جمعیۃ علماء کرناٹک کا انتخابی اجلاس جمعیۃ علماء ہندکے جنرل سکریٹری مولانامفتی سید معصوم ثاقب قاسمی کی نگرانی میں منعقد ہوا جس میں مولانا عبدالرحیم رشیدی کو مجلس منتظمہ کے اراکین نے اتفاق رائے سے اگلی میعاد کیلئے صدر منتخب کیا ۔ مولانا محمد باشاہ ، قاری مرتضیٰ خان، مولانا شمیم سالک اور حافظ ارشد احمد کو نائبین صدر ، اور حاجی ٹی محمد الیاس کو خازن منتخب کیا گیا ۔حاجی محب اللہ خان امین کو جنرل سکریٹری نامزد کیا گیا۔
اس سے قبل جمعیۃ علماء ضلع بنگلور کا انتخاب عمل میں آیا تھا۔ جس میں مولانا محمد صلاح الدین کو صدر، مولانا بشیر اللہ ، مولانا جنید احمد، مولانا شیخ آدم علی ،اور حافظ محمد آصف کو نائبین صدر اور حاجی احسان اللہ قریشی کو خازن منتخب کیا گیا۔ حافظ امداداللہ خان کو جنرل سکریٹری نامزد کیاگیا۔
تلاوت قرآن اور نعت سے مجلس کا آغاز ہوا، جنرل سکریٹری محب اللہ خان امین نے گزشتہ میعاد کی سکریٹری رپورٹ پیش کی جس میں جمعیۃ علماء کرناٹک اور اس کے اضلاع کے اراکین جمعیۃ العلما کے ذریعے انجام دی گئی خدمات اور سرگرمیوں کے تعلق سے معلومات فراہم کی۔ اجلاس میں ریاست کے تمام اضلاع کے اراکین بڑی تعداد میں شریک تھے۔