بنگلورو،26/دسمبر(ایس او نیوز) ریاستی وزیر داخلہ بسوراج بومئی نے کہا ہے کہ تشدد کو روکنے کے لئے پولس نے لاٹھی چارج کرنے کے فوراً بعدفائرنگ کر کے دانشمندی کا ثبوت دیا ہے اگر صرف لاٹھی چارج پر انحصار کیا جاتا تونقصان اس قدر زیادہ ہوتا کہ اس کا اندازہ بھی نہ ہو پاتا۔ بومئی نے کہا ہے کہ منگلورو میں شہریت قانو ن کے خلاف احتجاج کے دوران پیش آنے والے پر تشدد واقعات کے سلسلہ میں جب تک جانچ مکمل نہیں ہوجاتی کسی پولس افسر یا جوان پر کوئی کارروائی نہیں کی جائے گی۔ منگلورو میں اعلیٰ پولس حکام کے ساتھ ایک میٹنگ کے بعد انہوں نے کہا کہ ریاستی حکومت نے پہلے ہی اس معاملے میں سی آئی ڈی اور میجسٹریٹ کی جانچ کے احکامات صادر کردئیے ہیں - تحقیقات کی رپورٹ حکومت کو ملنے کے بعد اگر پولس والے خاطی نکلے تو ان پر کارروائی ہوگی اس سے پہلے کسی پر کوئی کارروائی نہیں کی جائے گی۔ اپوزیشن پارٹیوں کی طرف سے منگلورو کے پولس کمشنر ہرشا، ضلع کے ایس پی اور انسپکٹر کو معطل کرنے کے مطالبہ پر انہوں نے کہاکہ جانچ پوری ہونے تک کسی پر کوئی کارروائی نہیں کی جائے گی۔ انہوں نے کہا کہ منگلورو میں امن بحال کرنے کے لئے ان پولس افسروں نے جس طرح کی کارروائی کی اس کے لئے حکومت انہیں مبارکباد دیتی ہے۔ انہوں نے کہا کہ ان افسروں نے اچھا کام کیا ہے ان کو شاباشی دینی چاہئے نہ کہ اس واقعے کی آڑ میں انہیں نشانہ بنانے کی کوشش کی جائے -