ممبئی،26؍اکتوبر (ایس او نیوز؍ایجنسی) ادھو ٹھاکرے نے بی جے پی کا نام لئے بغیر کہا کے ان کی حکومت مستحکم ہے اور اگر ہمت ہے تو ان کی حکومت کو گرا کر دیکھو، 60 سالہ ادھو ٹھاکرے کے پچھلے سال وزیر اعلی بننے کے بعد یہ پہلی دسہرہ ریلی ہے۔

دسہرہ کے موقع پر اپنے قائد اور پارٹی صدر کے خطاب کو سننے کے لیے بڑی تعداد میں جمع ہوئے شیو سینا کے حامیوں اور پارٹی ورکرس کو اس وقت سخت مایوسی کا سامنا کرنا پڑا جب پہلی بار شیو سینا کی سالانہ دسہرہ ریلی شیواجی پارک میں منعقد نہیں ہوئی، جہاں پارٹی کارکن بڑی تعداد میں جمع ہوئے تھے تاکہ دسہرہ شام کو پارٹی کے سربراہ خطاب سن سکیں، بلکہ ریلی کا انعقاد آج ممبئی کے ایک آڈیٹوریم میں کیا گیا۔

ریاست میں کورونا وائرس کے پیش نظر اختیار کی جا رہی احتیاطی تدابیر اور انتظامیہ کی جانب سے جاری کرہ حفاظتی پروٹوکول کے پیش نظر مہاراشٹرا کے وزیر اعلیٰ ادھو ٹھاکرے، جو شیوسینا کے صدر بھی ہیں، نے وسطی ممبئی کے دادر میں شیواجی پارک گراؤنڈ کے سامنے سواتنتر ویر ساورکر آڈیٹوریم سے پارٹی کارکنوں سے خطاب کیا ہے۔

پارٹی کارکنوں سے خطاب کرنے سے پہلے ٹھاکرے اور ان کے اہل خانہ نے سب سے پہلے شیواجی پارک میں پارٹی کے بانی بال ٹھاکرے کی یادگار پر عقیدت کے پھول نچھاور کیے۔ ریلی کے دوران آڈیٹوریم میں ارد گرد کے لوگوں کا صرف پچاس افراد پر مشتمل ایک منتخب گروپ موجود تھا، جس میں وزرا، رہنما بھی شامل تھے۔ عوام اور پارٹی ورکرس اور پارٹی کے بہی خواہوں کے لیے اس تقریب سے استفادہ کے پیش نظر، اس تقریب کا پارٹی کے تمام سوشل میڈیا اکاؤنٹس پر براہ راست ٹیلی کاسٹ کیا گیا۔

دوران خطاب ادھو ٹھاکرے نے بی جے پی کا نام لئے بغیر کہا کے ان کی حکومت مستحکم ہے اور اگر ہمت ہے تو ان کی حکومت کو گرا کر دیکھو، 60 سالہ ادھو ٹھاکرے کے پچھلے سال وزیر اعلی بننے کے بعد یہ پہلی دسہرہ ریلی ہے۔ وہ 27 نومبر کو بطور وزیر اعلیٰ اپنے دفتر میں ایک سال مکمل کریں گے۔ 19 جون 1966 کو اپنے قیام کے بعد سے دسہرہ ریلی شیو سینا کے پروگراموں میں خصوصی اہمیت کا ایک اہم پروگرام رہا ہے۔ جو شیواجی پارک میں منعقد کیا جاتا رہا، تاہم اس بار کورونا کے باعث پہلی بار یہ دسہرہ ریلی دوسری جگہ منعقد کی گئی۔