بنگلورو میں لاک ڈاؤن تقریباً ختم،دکانیں کھلی رکھنے کی اجازت۔ ٹووہیلر س سمیت تمام گاڑیوں کو سڑک پر آنے کی اجازت،فلائی اوور اور اہم سڑکیں بند رہیں گی
بنگلورو،4؍مئی(ایس او نیوز) مرکزی حکومت کی ہدایت پر لاک ڈاؤن کے ضوابط میں نرمی کا نفاذ کرناٹک کی راجدھانی بنگلورو میں بھی ملک بھر کی مانند پیر سے ہونے جا رہا ہے۔ شہر کے پولیس کمشنر بھاسکر راؤنے لاک ڈاؤن میں لائی جانے والی نرمی کے بارے میں اتوار کی شام طلب کی گئی ایک اخباری کانفرنس میں تفصیل بتائی۔
انہوں نے کہا کہ لاک ڈاؤن میں نرمی کے باوجود شہر کے تمام فلائی اوور س اور بعض اہم سڑکو ں کو بند ہی رکھا جائے گا اور وہاں گاڑیوں کے آنے جانے کی اجازت نہیں ہو گی۔ انہوں نے کہا کہ صبح 7بجے سے شام 7بجے تک پولیس کی طرف سے سڑک پر اترنے والی کسی گاڑی سے پاس کا تقاضہ نہیں کیا جائے گا البتہ شام 7بجے کے بعد سے گاڑیوں کی آمد رفت پر تلاشی لی جائے گی اور صرف منظور شدہ زمرے کی گاڑیوں کو شناختی کارڈ یا پاس کی جانچ کے بعد ہی جانے دیا جائے گا باقی کسی گاڑی کو جانے نہیں دیا جائے گا۔
بھاسکر راؤ نے کہا کہ پیر کو گاڑیوں کو باہر نکلنے کی چھوٹ دی جا رہی ہے تو اس کے ساتھ ٹرافک قوانین کا بھی سختی سے نفاذ رہے گا۔ ہیلمٹ اور چہرے پر ماسک لگائے بغیر باہر نکلنے والوں پر قانون کے مطابق جرمانہ وصول کیا جائے گا۔ سڑکوں پر بے وجہ بار بار گھومنے والوں پر نظر رکھی جائے گی اور ان پر قانونی کارروائی ہو گی۔
انہوں نے اعلان کیا کہ پیر سے بنگلورو شہر میں تمام دکانوں کو کھلا رکھنے کی اجازت دی جارہی ہے صبح9بجے سے شام 6.30 بجے تک یہ دکانیں کھلی رہ سکتی ہیں۔انہوں نے کہا کہ شہر میں جن علاقوں کو کنٹین منٹ زون قرار دیا گیا ہے ان کے سوائے شہر کے دیگر تمام علاقوں میں تجارتی سرگرمیوں کی اجازت دی گئی ہے۔
انہوں نے کہا کہ شراب کی دکانوں کو بھی کھلا رکھنے کی سخت شرائط کے ساتھ منظوری دی گئی ہے۔ ان دکانوں کے باہر سی سی ٹی وی اور نجی سکیورٹی گارڈ کی تعیناتی لاز می ہو گی۔ زیورات کی دکانوں کو کھولنے کی اجازت دے دی گئی ہے۔ کمشنر نے کہا کہ شادی بیاہ کی تقریب میں 50لوگوں کو جمع کرنے کی اجازت رہے گی لیکن وہاں بھی چہروں پر ماسک اور سماجی فاصلے کی پابندی ضرور ی ہو گی-